“Hau mos konkorda katak tempu to’o ona atu tau prioridade ba saúde idozus sira, tanba ne’e ohin loron bolu atensaun ba Xefe Sentru Saúde (SS) husi Sub-distritu 65, inklui mos Administrador Distritu sira atu hala’o diskusaun ida, hodi hamosu mekanismu ne’ebe diak ba
implementasaun programa asistensia saúde ba idozus, tanba iha ona planu no programa,” dehan Ministru Martins, semana kotuk (15/04) hafoin halo enkontru ho Xefe SS sira, iha salaun Institutu Nasional Saúde (INS) Comoro Dili.
Razaun MS tinan ne’e fo prioridade ba saude idozus tanba, bazeia ba survey geografika ne’ebe iha, hatudu katak feto Timor-Leste bele moris to’o idade 62, tanba ne’e presiza prepara kondisoens atu fo asistensia ba sira.
Tuir Doutor Martins, moras ne’ebe dala barak afeta ba ema idozus sira, mak moras kurasaun, hipertensi (tensaun), mental, tilun diuk inklui mos diabêtes.
Iha programa ne’e MS kopera ho Ministerio Solidaridade Sosial (MSS), liu husi Diresaun Nasional Asistensia Sosial (DNAS) ne’ebe estabelese ona livru ida ho naran “Lisay”.
Livru ne’e idozu sira sei hetan iha sentru saúde no programa sisca, iha livru ne’e sei hakerek naran, sofre moras saida, atu fasil fa sira hodi asesu ba fasilidade saúde. No iha livru ne’e mos doutor sira sei fo esplikasaun klaru hahan ne’ebe sira labele han no saida mak sira labele halo atu bele prevene moras ne’ebe sira sofre.
“Ne’e importante tebes ba idozus sira atu ba prenxe iha Sentru Saúde, Postu SISCA atu bele fasilita sira hodi hetan asistensia saúde,” dehan Ministru Martins.
Entretantu Reprezentante World Health Organization (WHO), Doutor Jorge Mario Luna ne’ebe sai mos parseiru ba kontinuasaun prosesu implementasaun ba programa asistensia saúde ba idozus hateten, diskusaun ne’e importante tebes ba ministerio saúde atu foti mekanismu hodi dezenvolve programa asistensia saúde ba idozus iha 13 distritus.
“Ami sei oferese espesial teknika ba Ministerio Saúde, hodi halo teste moras hipertensi, diabetes no moras sira ne’ebe afeta ba saúde ema idozus sira nian, atu nune’e sira mos bele partisipa iha dezenvolvimentu nasaun nian,” dehan Doutor Luna.
WHO sei kontinua fo apoiu teknika ba MS no prontu kopera ho ministeriu hodi implementa planu no estratejia ne’ebe ministerio iha ba saúde idozus ho diak, atu bele atinji ho estandar ne’ebe internasional iha katak idozo bele moris liu tinan 62 liu-liu feto,” Doutor Luna esperansa.*
