Lideransa komunitariu (Xefe Suku iha Distritu sira) lamenta tebes ho konstrusaun Mini Merkadu no Eskola distritu sira ne’ebe la fo benefisiu ba povu tanba la iha kualdidade no Mini Merkadu balun sai fatin ba animal sira.
“Iha Distritu Bobonaro Kompania sira halo tiha mini merkadu no eskola teknika ida, iha distritu Bobonaro ne’e kualidade la diak,” lamenta Xefe Suku Hatudara, Sub-distritu Kailako, Distritu Bobonaro, Manuel Ximenes, semana kotuk (29/03) iha salaun Ministeriu Negosiu Estranjeiru bainhira partisipa iha sorumutu lider komunitaria sira ho Ministeriu Administrasaun Estatal Ordenamentu do Teritoriu (MAEOT), Parlamentu Nasional no Administrador Distritu sira.
Tuir Xefe Suku ne’e katak, konstrusaun ba Mini Merkadu no Eskola Teknika ne’e Kompania sira halo la iha kualidade tanba entrega la to’o fulan, baki sira nakfera tiha ona.
“Mini Merkadu balun halo tinan tolu ona desde 2009, maibe povu la uza, tanba povu hakarak hadia estrada no dada bee moos,” dehan Xefe Suku ne’e.
Entertantu Xefe Suku Letemumu, Sub-distritu Quelicai, Distritu Baucau, Mateus Soares Ximenes, dehan, hafoin nia halo fiskalizasaun ba projetu sira iha Distritu Baucau identifika katak, iha projetu tolu hanesan Mini Merkadu rua iha Sub-distritu Quelicai-Kuluguia no ida manutensaun agrikultura iha Baucau Seisal, Governu la tau atensaun mak Mini Merkadu sira ne’e du’ut nakonu ona.
“Ami nudar Asosiasaun Lider Komunitariu hodi husu ba ita nia nai ulun sira, oinsa buat nebe halo tiha ona bele utiliza, labele husik deit hanesan ne’e,” Xefe Suku Ximenes sujere.
Tuir nia, Lideransa Komunitaria sira la satisfeitu ba Mini Merkadu sira ne’e, tanba gasta deit povu nia osan.
“Hodi ida ne’e mak husi Asia Foundation suporta ami, husi Asosiasaun distritu hat mak Distritu Baucau, Oe-Cusse, Ainaro no Distritu Bobonaro, ami mai iha ne’e konvida ministeriu relevante atu halo konferensia ba sira oinsa para mini merkadu no manutensaun agrikultura sira ne’e povu bele uza,” Xefe Suku Ximenes katak.
Iha fatin hanesan Vise Prezidenti Parlamentu Nasional, Deputada Maria Paixao rekonese katak, durante ne’e akontese iha kontradisaun KDD ho Kompania sira tanba Kompania sira seidauk familiariza sistema foun nebe iha lei hateten.
“Iha dekretu lei numeru 18, kompania sira tenki kompriende didiak dekretu lei ne,” Vise PN Deputada Paixao husu.
