Atu labele lakon direitu votus nian, pasientes baixa iha Ospital Nasional Guido Valadares (HNGV) mos tuir votasaun iha eleisaun prezidensial segunda volta, iha sira nia fatin. “Hau halo ona hau nia direitu,” hateten Pasiente Francisco Boavida, semana kotuk (16/04) hafoin tuir votasaun iha HNGV, Bidau Toko Baru, Dili.
Pasiente ho moras Tuberculose (TBC) ne’ebe baixa iha ospital desde tempu Indonezia ne’e, sente kontente, tanba maske moras maibe bele ezerse nia direitu nudar sidadaun.
Votasaun ho sistema tama-sai salas pasiente sira ne’e, hahu iha tuku 07:00 dader no remata iha tuku 11:30 ho total votantes (pasiente no mediku sira ne’ebe halo hela knar iha loron ne’e) hamutuk 200 resin.
“Mais u menus 115 hanesan ne’e ba pasiente sira ne’ebe tuir votasaun, agora ba mediku, enfermeiru/a no pesoal saude sira ne’ebe ohin loron servisu iha ne’e, iha 100 resin,” hateten Supervisor HNGV, Silverio de Magalhaes, (16/04) hafoin remata votasaun ba iha pasiente sira iha sala Emerjensia HNGV, Dili.
Votasaun iha HNGV ne’e la atende familia pasiente, e sira bele ba vota iha sentru votasaun ne’ebe sira rejistu ba.
Salas hirak ne’ebe sira kobre mak hanesan, sala cirurjia mane no feto, medisina mane no feto, sala fase ran nian, sala maternidade, izolamentu, VIP no ikus liu iha sala emerjensia.
“Sala ICU mak ami la tama tanba todan liu, e mos enfermeirus ne’ebe todan tanba iha balun matan aat, entaun sira labele vota, restu ne’e sira vota hotu,” katak Supervisor de Magalhaes.
Kompara eleisaun primeira ronde ho II ronde, segubdu ronde diak liu tanba pasiente hotu-hotu bele ezerse sira nia direitu hodi tuir votasaun.
“Iha primeira volta, la tama-sai salas pasiente sira, maibe sentru votasaun tau deit iha ospital klaran, depois mak pasiente ba vota, e balun la vota tanba la’o la diak, e agora diak los,” dehan Observadora husi Sekretariadu Tekniku Administrasaun Eleitoral (STAE) ne’ebe lakohi publika nia identiidade ba publiku ne’e.*
