Diretor Fundasaun Educasaun Matebian (FEKM) Distritu Baucau, Lino Lopes hateten durante fulan Janeiru to’o Abril, sira konsege rezistu kazu krimi hamutuk 97 inklui mos kazu Violensia Domestika (VD).
“Iha kazu feto mak aprezenta iha 25 kazus, balun mane mak aprezenta iha 62 kazus. Husi kazus hirak ne’e balun mak ami resolve ona, balun seidauk,” hateten Diretor FEKM Lopes, semana kotuk (03/04) iha nia knar fatin Tirilolo, Baucau.
Tuir Diretor Lopes, kazus hirak ne’e mak hanesan kazu rai nian, violasaun sexual, violensia domestika e mos kazu kona ba eleisaun prezidensial nian no total kazu ne’ebe resolve ona hamutuk 15 kazus.
Kazu ne’ebe resolve ona mak hanesan kazu violensia domestika balun, violensia sexual, enkuantu kazu kona ba rai nian resolve ho dalan halo mediasaun ho autorridade local sira.
“Ami mos iha staf balun ne’ebe servisu ba iha baze ne’e mak ami servisu hamutuk hodi atende kazu sira ne’e,”hateten tan Diretor Lopes.
Iha parte seluk Staf Para legal FEKM Sub-distritu Venilale, Roberto Ximenes hateten, sira nia servisu mak ajuda komunidade ka vitima atu oinsa mak bele halo keixa kona ba sira nia kazu ne’e.
“Ami ajuda komunidade sira atu hato’o kazu ne’e ba iha Fundasan Educasaun Matebian Baucau ne’ebe sira hasoru iha baze ida ne’e mak staf para legal nia servisu,” hateten Staf Ximenes.
Tuir nia, kazu sira ne’e mak hanesan hadau malu rai, fen ho laen husik malu, violensia domestika sira hatama hotu maibe nia prosesu ne’e Polisi sira mak atende, no ne’e Tribunal nia servisu.
“Kuandu sira hare mak violensia domestika mak violensia ida ne’ebe ke bo’ot liu no as liu, ami labele resolve ida, maibe ki’ik liu tenki kopera ho polisia sira atu bele resolve,” nia katak.
