Vitima dezastre naturais uma kain 20 husi Suku Afaloakai, Sub-distritu Uato-Carbau, Distritu Viqueque nebe mak foin dadauk anin sobu sira nia uma to’o agora governu seidauk fo asistensia ba sira.
“Bainhira hau baixa iha ospital hau simu telefone, hau telefone kedas ba sekretariu estadu, mais ohin dader hau simu telefone seidauk iha intervensaun,” hateten Deputada Tereza de Carvalho, semana kotuk, (02/04) iha Uma Fukun, Dili.
Tuir Deputada de Carvalho, Governu liu husi Ministeriu Solidaridade Sosial (MSS), bainhira fo ajudus ba vitima dezastre naturais sira, tenke fo hanesan hotu.
“Karik Governu halo ona intervensaun ba iha fatin seluk, maibe iha Sub-distritu ne’e seidauk,” Deputada ne’e kritika.
Deputada ne’e hatutan, tuir informasaun ne’ebe nia parte simu husi komunidade sira iha fatin ne’eba katak Ministra Solidaridade Sosial to’o deit iha Sub-distritu, maibe la to’o iha vitima sira iha Suku Afaloakai.
“Tanba ne’e mak husu baq Ministeriu Solidariedade Sosil atu hare sasan ne’e didiak atu nune’e povu labele kestiona bebeik ba imi nia servisu,” Deputada de Carvalho sujere.
Entertantu tuir Deputadu Alberto da Silva Cruz, katak kestaun ne’e Xefe Suku no Xefe Aldeia iha fatin ne’eba hato’o ona ba iha MSS ka la’e, tanba dezastra naturais buat emerjensia ida.
“Kuandu informasaun tama ona iha Sekretariu Estadu Dezastre Naturais, nia tenki despaixu kedan, foti dadus,” Deputadu da Cruz kestiona.
“Wainhira uma hetan sobu duni tenser lori duni hahan, manta ,bikan no kanuru para fo kondisaun diak ba sira hodi moris loro-loron nian,” Deputadu ne’e dehan.
Wainhira TDW koko konfirma asuntu ne’e ba iha Ministeriu Solidariedade Sosial maibe la konsege tanba Ministra MariaDomingas Alves desloka tiha ona ba Singapura.
