Deputada Fernanda Borges hateten, tuir predisaun metodolojia Australia nian katak siklonia lima ne’ebe mosu iha tasi Timor nian, hatudu katak tinan ne’e sei akontese anin bo’ot.“Siklonia lima ne’e nia anin iis bo’ot sei atinji iha distritu sira,” hateten Deputada Borges, iha plenaria Parlamentu ,semana kotuk,(19/03).
Tuir Prezidente Komisaun A Parlamentar katak, siklonia lima ne’e sei mosu iha Distritu, liu-liu ba Distritu sira nebe mak area siklonia ninian.
“Hau husu katak, ita nia viuru Metrolojia iha Timor-Leste servisu maka’as liu ho Australia nian, atu nune’e hetan informasaun nebe diak, tanba sira iha neba informasaun nebe klean ,diak no los tanba sira nia metrolojia halai bebeik ba siklonia, “ sujere Deputada Borges.
Nia dehan ,Governu iha obrigasaun atu fo hatene ba povu atu nune’e povu bele hatene lolos para sira prevene sira nia an.“La’os kalan sira toba hela mak ai monu sira nia leten,ou sira nia kakuluk hit sae tiha,” dehan Deputada ne’e.
Entertantu Deputada Clarina Alves, sujere ba Governu, liu-liu ministeriu kompetente atu hare didiak kestaun ne’e, ne’ebe sei afeta ba Timor-Leste.
“Anin bo’ot mai ho kalan, ita nia adat sira ne’e dehan, avo ka matebian sira mak hirus mais lae, tanba ita la kompriende,” dehan Deputada Alves.
Tanba ne’e, nia husu ba Governu tenki hato’o informasaun ne’e ba iha povu, atu nune’e povu sira hodi prepara an.
