Atu eleisaun Prezidensial la’o ho diak no justu sein viola ema nia direitu, Provedor Direitus Humanus e Justisa (PDHJ) sei estabelese ekipa iha Distritu hat ne’ebe sei kobre Distritu sira seluk hodi halo monitorizasaun.
“Ekipa ida iha Maliana ne’e sei kobre Distritu Suai no Ermera, depois ekipa ida iha Distritu Same sei kobre Distritu Aileu, Ainaro no ekipa ida tan iha Distritu Baucau sei kobre Distritu Lospalos, Manatuto, no Distritu Viqueque e ekipa hat ne’e mak sei kobre Distritu hotu,” hateten Provedor Sebastiao Dias Ximenes, semana kotuk (05/03) iha Kaikoli, Dili.
Provedor Ximenes hatutan, objetivu husi monitorizasun ne’e atu hare no monitoiza kona ba karik iha mosu violasaun direitus humanu iha eleisaun nia laran.
“Ita hotu hatene eleisaun ne’e direitu sidadaun hotu-hotu nian, portantu ami iha ekipa nebe monitoriza karik iha violasaun direitus umanu,” Provedor Ximenes dehan.
Iha ekipa ne’e inklui mos elementus husi boa governasaun nian, hodi hare karik iha funsiunariiiu balun partisipa iha atividade kampanha sein autorizasaun.
Provedor Ximenes afirma, PDHJ servsu hamutuk ho Sekretariadu Tekniku Administrasaun Eleitoral (STAE) hanesan observadores nasional, sei monitoriza ba ema nebe maka uza asset governu nian hodi halo kampanha.
“Ami hare tuir ami nia knar sei kuandu ami hare katak iha violasaun Direitus Humanu antaun ami kaer no investiga, kuandu sei iha karik failansu ruma iha prosesu ne’e ami depois sei kordena mos ho CNE tanba sira nia elementus mos iha ne’eba,” dehan Provedor Ximenes.
Iha lidun seluk Membru Parlamentu Nasional, Deputada Fernanda Borges, konkorda ho atividade nebe maka PDHJ halo’o dadaun ne’e.
“Hau hanoin PDHJ halo ne’e diak e hau espera katak kuandu kampanha presidensial hotu, PDHJ rasik bele hatama relatoriu no sei hare ba evidensia forti hanesan hau hare iha televisaun hau hare iha balun mak uza kareta estadu, tuir lolos ne’e labele tanba ne’e krimi, ne’e vekulato uzus ho vekulato abuzu de poder, ” sujere Deputada Borges.
Atual Prezidente Partidu Unidade Nasional (PUN) ne’e sujere, wainhira PDHJ kompleta ona relatoriu bele haruka ba Komisaun Anti Korupsaun (KAK) ba iha Comisaun Nasional Eleisaun (CNE) hodi nune’e prosesa ema nebe uja asset estadu nian ne’e importante tebes.
