Prezidente Komisaun A Parlamentar, Deputada Fernanda Borges, PUN, husu ba media sira atu labele simu suborno husi Kandidatu Prezidente (KaPrez) sira no presiza fo informasaun ne’ebe imparsial tanba media iha responsabilidade bo’ot.“Se media mak ba simu uluk suborn husi KaPrez, osan ka previlezios ruma, halo nusa mak media bele hakerek lia los kona ba KaPrez ne’e. Ne’e la’os ona media independente, maibe media ba funsiunariu KaPrez nian,” dehan Deputada Borges, foin lalais (28/02) iha Uma Fukun, Dili.
Deputada Borges husu ba media sira atu iha unidade, hodi fo informasaun ne’ebe lolols ba povu no tuir Kodigu Etika Jornalismu nian.
“Hau husu media mos unido. Dala barak ona hau nudar Prezidente Komisaun A tuir incontru lubuk ida ona ne’ebe husu ba media atu hamutuk, servisu hamutuk la’os grupu-grupu, ida-idak konforme nia hakarak la’e, ba interese nasional hodi hakerek sira nia Kodigo de Konduta.”
Iha parte seluk Diretora Ezekutiva Fundasaun Fundu Media (FFM) Suzana Cardoso hateten jornalista ida bainhira simu suboron husi fontes ne’e kontra Kodigu Etika Jornalistika.
“Hau konkorda katak jornalista labele simu suborno,” nia haktuir.
Tuir nia mos katak bainhira jornalista ida simu suborno husi fontes ruma, laiha ona independensia notisia ne’ebe nia hakerek.
Entertantu Deputy Publisher no Business Director Suara Timor Lorosa’e (STL) Domingos Saldanha hateten em prinsipiu media labele simu subornu tanba ne’e hatun ona kredibilidade media nian.
“Maibe iha dever no direitu kona ba publisidade, kona ba anunsiu, kona ba akta editorial ruma ne’e media iha dever no direitu atu simu tanba ida ne’e kona ba media ninia iis atu bele sustenta nia a’an atu bele hala’o nia knar,” Deputry Saldanha hateten.
