Relasiona ho kandidatu Prezidente (KaPrez)balun bainhira halo kampanha involve labarik sira iha sira nia kampanha, membru Parlamentu Nasional, Deputada Fernanda Borges lamenta tebes no viola ona konvensoens internasional, lei partidus politikus nian no lei eleitoral nian.
“Hau hare iha televizaun, labarik minoridade barak mak tula iha kareta atu involve iha aktividade kampanha, ne’e ladiak, viola konvensoens internasionais se sira ne’ebe idade to’o ona bele partisipa ho sira nia konsensia labele ema uza sira aumenta numeru kampania nian ne’e lalos,” lamenta Deputada Borges, semana kotuk (05/02) iha Parlamentu Nasional.
Tuir nia katak involvimentu labarik iha aktividade kampania ne’e sedu liu tanba sira nia tinan seidauk atinji 17 anos no sira seidauk komprende konaba politika ne’eduni governu presiza fo protesaun ba sira. Involvimentu labarik mos bele fo imagen negativu ba nasaun demokratiku ida ne’e.
“Husu ba kandidatu presidente sira atu tau prioridade ba involvimentu labarik iha kampania labele lalin labarik sira hodi atinji objetivo kampania nian, apelu mos ba inan aman sira atu toma atensaun ba labarik sira tanba sira seidauk bele komprende politika,” Nia rekomenda.
Iha parte seluk Komisario, Lucas De Sousa katak tuir lei dehan labarik minoridade labele involve iha aktividade kampania tanba sira nia idade seidauk to’o maibe familia iha interese atu rona misaun no vizaun kandidatu presidensial ne’ebe sira hakarak entau kandidatu no eqipa susesu sira mak tenke fo orientasaun klaru ba militantes sira katak labarik labele lori ba fatin kampania.
“Ami konsege registu kazu involvimentu labarik minoridade barak maibe diak liu kandidatu no eqipa susesu sira tenke fo oreintasaun ba apoiantes sira tanba karik akontese buat ruma ba labarik sira laos komisaun Nasional Eleisaun nia problema maibe kandidatu sira,” dehan Komisario Sousa, Semana kotuk (06/03) iha edifisiu CNE.
Tuir eqipa Monitorizasaun , Aplinario Ximenes katak Organizasaun Non Govermental Forum TauMatan (FTM) nudar parseiru husi Komisaun Nasional Direitu labarik (KNDL) atu halao monitorizasaun ba involvimentu labarik iha aktividade kampania presidensial hatudu duni involvimentu labarik sei makas tanba Comisaun Nasional Elisoens (CNE) no Sekretariado Tekniku Andministrasaun Eleitoral (STAE) laiha lei kodigu kondunta ba involvimentu labarik iha aktividade kampania.
“Ami hare apoiantes iha fatin kampania un prusentus labarik hanesan balun organizadu tara tais ba kandidatu sira, akompania inan aman no balun mos ho inisiativa rasik atu partisipa,” dehan Eqipa Monitorizasaun husi (FTM), Apolinario Ximenes, Semana Kotuk (05/03) iha edifisiu Kaikoli Dili.
Nia hatutan katak realidade ne’ebe akontese iha Distritu Dili, Lequisa labarik maioria akompania inan aman ba iha fatin kampania. Involvimentu labarik iha kampania durante ne’e laiha vitima maibe iha risku violensia ne’eduni estado iha obrigasaun fo protesaun ba labarik sira husi risku violensia maske involvimentu laos krime.
