Relasiona ho aihan ne’ebe tama mai iha rai laran ho numeru ne’ebe bo’ot no tempu ne’ebe limitadu, no lakonsege fa’an hotu, tanba ne’e tuir Diretor Nasional Asistensia Sosial Ministerio Solidaridade Sosial (DNAS-MSS), Amandio Amaral Freitas katak iha future presiza duni estabelese banku alimentar nian nune’e bele kanaliza aihan sira ne’e hodi fahe ema ne’ebe presiza hetan atensaun.
“Estratejia ida iha Ministerio Solidaridade Sosial iha futuru atu loke banku alimentar ida atu bele hare kestaun sira ne’e maibe la’os governu mak atu loke maibe governu supporta ema atu loke hodi bele kanaliza aihan sira ne’ebe besik frazu ona hodi supporta ba ema vulneravel sira
ne’ebe hela iha instituisaun,” dehan Diretor Freitas, semana kotuk (16/02) bainhira aprezenta politika MSS durante tinan lima iha parte seguransa alimentar iha Centru Convensoens Dili.
Tuir nia,maske governu ida ne’e falta deit fulan hira atu remata mandatu, espera katak governu foun mai bele hatutan planu ida ne’e iha future.
“Nudar politika limitado ona maibe roda estado sei la para, politika na’in sira bele troka maibe la signifika katak troka hotu makina estado nian hanesan teknika sira iha ministerio hotu. e espera katak planu sira ne’e labele koalia deit maibe iha loron ida bele estabelese duni atu bele nesesita nesesidade komunidade vulneravel sir,” nia esperansa.
Iha lidun seluk Diretor Organizasaun Non Govermentais (NGO) Asosiasaun Hi’it Ema Ra’es Timor (ASSERT), Francisco de Deus Soares, apoia ba planu ida ne’e maibe tenke hare mos kualidade aihan ne’e.
“Hau hanoin diak tanba bele ajuda komunidade sira ne’ebe vulneravel,liu-liu organizasaun ema alezadu sira maibe tenke iha kualidade tanba aihan sira ne’e fulan rua deit liu ona pazu,” nia dehan.
Maske nune’e nia mos duvida kona ba aihan sira ne’ebe sei fahe ba grupu vulneravel sira ne’e tanba ho kondisaun estrada ne’ebe ladiak bele empede atu aihan sira ne’e to’o lalais iha ema alezadu (NGO ne’ebe tau matan ba alezadu) balun ne’ebe hela iha distritu.
“Aihan ne’e fulan rua deit liu ona prazu, no distribuisaun tarde halo ema bele lanu fali bainhira konsumu aihan sira ne’e,” nia duvida.
“Iha esperensia ne’ebe iha dalabarak aihan lanu ema la’os prazu liu ona deit maibe ho kontiudu kimia sira iha hanan ne’e nia laran mak fo impaktu ba ema nia saude bele mate entau presiza analiza didiak bainhira implementa inisiativu ida estabelese banku alimentar ne’e no presiza mos kolabora ho Ministerio Turismo Comersio Industria (MTCI) atu kanaliza mos aihan sira ne’ebe MTCI rekoila husi programa povu kuda governu sosa iha banku alimentar ne’e hodi bele supporta ba komunidade ne’ebe presiza labele depende deit ba kompania aihan sira,” nia sujere.
