Planu Ministeriu Justisa (MJ) servisu hamutuk ho Ministeriu Saude (MS) atu monnta postu rejistu moris nian iha Ospital Referal (OR) neen atu bebe ne’ebe moris mai bele hetan kedas sertidaun moris nian maibe seidauk realiza tanba falta de orsamentu no rekursu umanu.
“Ami foin estabelese postu de registo iha Ospital Nasional Guido Valadares iha tinan 2008 e foin dadauk ne’e ami estabelese tan postu ida iha Ospital Referral Baucau no pesoal tekniku ida atu fo asistensia ba khosok oan sira ne’ebe moris iha ospital refere , ami mos iha planu ida atu estabelese tan iha Ospital Referral Oecuse, Maliana, Suai no
Ospital Referal Maubise maibe seidauk realize tanba ami iha limitasaun ho rekursu umanu,” dehan Diretor Nasional Registo do Notariado (DNRN) Distritu Dili, Victor da Costa Neto, semana kotuk (10/02) iha knar fatin Kaikoli Dili.
Diretor Neto hatutan, DNRN servisu hamutuk ho Ajensia Internasional UNICEF konsege rejistu bebe oan ne’ebe moris iha uma no Sentru Saude ne’ebe laiha postu rejistu maibe liu husi lideransa komunitaria durante Fevereiru to’o Dezembru 2010 ho total 13.749 khosok oan.
Iha lidun seluk Staf Teknico Administrative Registo Moris iha Ospital Nasional Guido Valadares (HNGV), Izilda Maria Ribeiro husu ba inan-aman sira atu prepara kedas oan nia naran antes mai iha postu rejistu moris nune’e labele impede fali ema seluk.
“tanba iha ospital ne’e iha deit pesoal nain rua mak atende, entaun inan-aman tenke prepara kedas oan nia naran labele to’o mai mak hanoin fali e mos labele tau naran singkat tenke tau kompletu nune’e labele impede ema seluk ne’ebe presiza mos asistensia,” nia husu.
Nia informa tan, kona ba labarik ne’ebe moris iha Sentru Saude seluk iha Dili laran, pesoal postu rejistu moris iha HNGV sei la simu maibe sira tenke ba iha sentru rejistu distrital nian.
“Iha ne’e so atende deit labarik ne’ebe moris duni iha ospital ne’e iha sala maternidade kada loron,” nia katak.
Enkuantu tuir nia, iha Janeiru 2012 sira fo ona asistensia ba khosok oan hamutuk 200 ne’ebe moris iha HNGV. Semana ida fo asistensia dala ida enkuantu durasaun ba prosesu halo sertidaun RDTL semana rua nia laran.
Entretantu total labarik ne’ebe moris iha HNGV iha sala maternidade no hetan ona sertidaun RDTL durante 2011 hamutuk 1.616 kompostu husi mane nain1.039 no feto nain 577.
