Diretor eskola Ensino Sekundariu Nicolau Lobato, Marcos S. Pacheco hateten sintina eskola nian ne’ebe lolos estudante sira mak uza maibe komunidade sira ne’ebe hela besik eskola mos uza hotu e ida ne’e fo impaktu ba estudante sira bainhira tuir prosesu aprendijazen.
“Ami iha toilet rua maibe ida a’at no ida mak diak e toilet ne’e la’os ba estudante deit mak uza maibe komunidade sira ne’ebe hela iha area escola ne’e mos uza hamutuk hotu toilet ne’e,” informa Diretor Pacheco, semana kotuk (07/02) iha nia knar fatin Tasitolu, Dili.
Kona ba bee moos, tuir nia katak bee mai durante 24 oras maibe komunidade sira ne’ebe husi aldeia foun iha Tasi Tolu mai kuru hotu iha eskola ne’e e impede prosesu aprendizajen tanba halo barulhu.
“Bainhira prosesu aprendizajen la’o, komunidade sira mai kuru bee no halo barulhu ida ne’e fo impaktu ba labarik sira atu tuir lisaun ho diak,” nia kestiona.
Nia dehan kona ba sintina ne’ebe aat, nia parte hatama ona proposta ba iha Ministeriu Edukasaun oinsa mak bele hadia hikas sintina ne’e.
Enkuantu total estudante ne’ebe eskola iha eskola ne’e hamutuk 762 e sira hotu bele asesu ba iha bee no saneamentu ho diak inklui mos estudante husi Pre-secundario.
Iha parte seluk Vise Prezidente Komisaun F Parlamentar Francisco Jeronimo hateten kuaze iha escola ensino baziko iha teritorio tomak atu asesu ba iha saneamentu baziko liu-liu toilet difisil.
Tuir nia, iha eskola balun iha sintina maibe laiha bee moos. “Sira halo tiha projetu sira ne’e saneamentu toilet ne’e iha kompletu maibe bee la iha halo nusa mak atu bele resolve problema ne’e ,” Deputadu ne’e kestiona.
Deputadu ne’e katak, ho problema ne’e halo estudante feto mak sai vitima enkuantu ba mane laiha problema ida ,mane bele ba ailaran sira ne’e fasil hela maibe feto labele.
Entertantu bainhira TDW koko konfirma asuntu ne’e ba iha Diretor Nasional Projeto no Infra-estrutura Ministerio Educasaun (ME) nian maibe lakonsege tanba laiha fatin.
