Eis Ministru Interior Rogerio Lobato hateten, Polisia Unidade Intervensaun Rapida (UIR) tuir lolos labele kaer kilat bo’ot tanba sala utiliza bele kria violasaun.
“Hau senti katak, iha 2004 ita iha Polisia iha unidade rua kaer kilat bo’ot, hanesan URP ho Unidade Patrulhamentu Fronteira,” hateten Lobato semana kotuk (15/02) hafoin hasoru malu ho jornalista sira iha Fundasaun Mahein, Balidi Dili.
Tuir eis Minsitru ne’e, tuir lei organika polisia nian, lolos UIR uza deit pistol no labele kaer kilat bo’ot tanba UIR unidade ida iha meus ida para atu hala’o lei no orden iha momentu nebe defisil liu.
”Agora to’o momentu ida situasaun hanesan la kontrola ona entaun Polisia bele husu ba Forsas Armadas mais ida ne’e ba ultimo rekursu ona,” nia kritika.
“La iha nesesidade ba polisia UIR no Task Force sira atu kaer kilat bo’ot tanba ida ne’e perigu,”.
Entertantu Diretor Interino Fundasaun Mahein (FM) Frey Guteres apoia ho hanoin husi Lobato nian katak, polisia labele kaer kilat bo’ot.
“Ami hare fali husi Polisia Komunitaria,Polisia Komunitaria hateten, tenki kaer kilat boot hodi halo prevensaun ba konflitu,ida ne’e mak barak liu, lolos sira uza deit pistola” nia katak.
Tuir nia, ema ne’ebe iha kompetensia atu kaer kilat mak Forsa Defeza Timor-Leste (F-FDTL) la’os Polisia.
Nia tenik, dala barak Polisia sira kaer kilat bo’ot la tuir regra polisia ninian,tanba lei sira ne’e hakerek ho lian Portgues difikulta ba sira atu hatene regra sira ne’e.
