Relasiona ho trabalhadores Timoroan ne’ebe ba servisu iha Korea do Sul balun servisu iha area agrikultura inklui feto sira. Tuir trabalhadora Marta Tilman feto bele halo servisu iha area saida deit inklui mos sai agrikultor iha ema nia rai.
“Nudar joventude maske ita feto, labele tur hakmatek deit iha uma bainhira ita la kontinua estudu iha universidade. Ita tenke fiar aan atu kompete ho mane sira iha seitor oi-oin no ita mos bele hala’o servisu iha estranjeiru hanesan Korea alende mane sira,” hatete Juventude Tilman, semana kotuk (06/02), iha serimonia despedida ba trabalhadores atu ba Korea do Sul, iha Salao SEFOPE, iha Kaikoli, Dili.
Juventude ne’e hatutan tan katak nia desloka ba iha Korea du Sul iha 13 Fevereiru foin lalais ne’e, atu servisu iha setor agrikultura enkuantu trabalhador balun servisu iha area fabrika no peska nian.
Nia hatutan maske sira seidauk iha kunesementu ne’ebe diak iha area sira ne’e maibe fiar katak sira bele compete ho mane sira atu servisu iha seitor saida deit.
“Hau kontente tebes tanba bele hetan oportunidade no fiar husi SEFOPE atu ba hala’o servisu iha ema nia nasaun tanba liu husi prosesu ne’ebe naruk hau konsege hetan duni rezultadu ne’ebe diak ba hau nia moris,” nia kontente.
Iha fatin hanesan Zaquelina de Jesus Fatima Guterres husi Distritu Baucau ne’ebe aranka mos iha fulan Fevereiru ba Korea do Sul hateten katak sira sei hanoin nafatin lia fuan ne’ebe Director Diresaun Nasional Emprego, Paulo Alves, dehan ba sira nudar feto tenke tau aas dignidade, nudar feto tanba iha ne’eba iha responsavel kompania balun malandru ka ‘nakar’.
“Ami sei la haluha mensajen ne’e e ami sei kuidadu ami nia aan nudar feto nune’e ami bele susesu iha ami nia servisu ne’ebe iha tanba servisu ne’e importante tebes mai ami no ami nia familia,” dehan Trabalhadora Guterres.
Tuir dadus ne’ebe SEFOPE iha hahu husi Tinan 2009 to’o agora dadaun iha Trabalhadores Feto Timoroan hamutuk nain 66 mak halao servisu iha Korea de Sul iha area oi-oin hanesan area Peskas, Fabrika no Agrikultura.
