Maske husi loron ba loron estrada iha Kapital Dili nakonu ho kareta no motor no ida ne’e kauza ba engrafamentu, Diresaun Nasional Transporte e Terestres (DNTT) labele limita ema atu sosa kareta hodi halai iha Dili laran tanba laiha baze legal ida.
“DNTT so limita deit kompanha sira ne’ebe hatama kareta mai Timor tenke tinan lima mai kraik, labele tinan lima ba leten,” hateten Staf Senior Traffic Light DNTT, Joao Eugenio C. da Silva, semana kotuk (02/02), iha Balide, Dili.
Tuir nia, kona ba transportes publiku husi 2010 to’o agora seidauk iha aumenta, so iha Dezembru 2010 aumenta ba taxi 107.
DNTT Staff Da Silva hatutan, dala barak akontese engrafamentu iha kapital Dili tanba kareta bot sira nebe mak tula kontainer mos okupa dalan.
“Ita hare katak liu-liu Audian ho Colmera, Bairopite neba tanba kontainer asves tama sai halo engarafamentu teb-tebes,” nia dehan.
Kona ba atu limita ema sosa kareta, nia dehan sei hato’o ba Diretor DNTT atu halo reuniaun ida ho ministru sira hodi hato’o asuntu ne’e ba iha Konselhu Ministru (KM).
“Ita nia lei iha, koalia konaba kareta nebe mak halai liu tinan 5, ne’e labele halo transportes publiku mas foin dadauk 2009 ba 2010 diretor foun sae fali, Diretor autoriza katak, la’os hare ba ninia tinan mas hare ba ninia la’o bele halo transportes publiku ka lae,” nia tenik.
Entertantu Membru Parlamentu Komisaun G, Deputadu Arao Noe hateten, lor-loron sempre akontese engrafamentu tanba impaktu husi kareta nebe mak tula kontainer barak liu.
“Ida mak ita nia kondisaun estrada ki’ik, kareta aumenta maka’as ita la konsege ekilibre ho estradas nebe mak iha, pur ezemplu husi leste atu sai ba loro monu, liu uniku atravesa deit mak ponte Comoro,” Deputado Noe dehan.
Alende ne’e Deputado Joaquin Amaral hateten katak, to’o horas ne’e lei sidauk iha atu limita ema sosa transportes sira, maibe akontese engerafmentu ba bebeik iha sidade Dili tanba administrasaun no jestaun ba estrada mak sidauk iha.
“Ita bele administra bele halo jestaun, kareta tipu saida mak jam-jam tertentu, pur ezemplu tuku 08:00 to’o 06:00, trailer sira sirkula bele vontade ka lae, track sira ne’e bele sirkula iha fat-fatin sira ne’e ka lae,” hateten Deputado Amaral.
Deputado Amaral dehan, la’os halo diskriminasaun ba kareta sira maibe halo administrasaun ba tipu kareta sira .
“Ita fo prioridade, ita halo tiha admsitarasaun ba tipu kareta sira ne’e hotu mak ita foin hare estrada nia kapasidade labele simu ona kareta tanba kareta demais ona tama ba halo luan estrada ka hadia trafik light sira ne’e”
Nia dehan, Governu tenki regula uluk movimentasaun kareta nian iha kapital Dili, depois mak kareta ne’e viola nafatin mak Polisia sira kaer.
“Diresaun Nasional Transportes Terestre, laos atu kobra taxa mas oinsa bele halo admistrasaun.
