Ministru Ekonomia e Dezenvolvimentu (MED), Joao Goncalves, hateten katak prosesu kriasaun Banku Dezenvolvimentu Nasional Komersiu Timor-Leste (BDNCTL), oras ne’e dadauk kontinua la’o maski prosesu kleur.
“Buat ne’e liu husi prosesu ida tanba ida ne’e la’os Estadu nian maibe setor privadu nian. Ne’eduni ita presiza planu de asaun nebe uluk aprova tiha ona iha Konselhu Ministru. Ita buka hela asionista ne’ebe atu servisu hamutuk ho banku,” hateten Ministru Goncalves, semana kotuk (06/02), iha Sentru Konvensaun Dili.
Ministru Goncalves haktuir katak atu sai asionista ba kriasaun BDNCTL, NGO Geo Kapital hatama ona sira nia proposta ba iha Banku Sentral maibe aprova entaun tenke buka fali asionista seluk.
“Razaun Banku Sentral la simu katak, sira fo hatene tuir sira nia hare katak instituisaun ne’e labele reuni kondisaun ne’ebe mak sira bele simu,” tenik Ministro.
“Ita labele eziji ba Banku Sentral tenki simu NGO Geo Kapital ne’e tanba ida ne’e sira nia regra iha Banku nia laran mak hanesan ne’e,” nia katak.
Ministru Goncalves hatutan alende NGO Geo Kapital iha mos Banku Espiritu Santo Portugal nian, no Banku Investimentu Portugues mos iha.
“Foin dadauk hau nia deslokasaun ba iha Portugal, hau hasoru tiha ona diresaun banku rua ne’e ninian, koalia tiha ona ho sira e husu sira para atu hatama sira nia proposta ne’e mai,” nia dehan tan.
Ministru Gocalves esplika Konselhu Ministru desidi ona katak, estadu sei iha 51 pursentu aksoens nune’e katak maioria aksaun ba banku ne’e. No mos katak setor privadu 49 pursentu maibe setor privadu sei fahe ba rua, setor privadu Timorense sei 25 pursentu no setor privadu husi estranjeiru mak 24 pursentu.
“Asionista nasional agora ami nafatin rua. Uluk ami loke konkursu publiku, konvida tan asionista para atu partisipa maibe la iha manifestasaun interese ruma ami la simu,” nia afirma.
“Ita hanoin katak Governu labele kaer buat hotu-hotu, ne’ebe buat ne’ebe mak setor privadu nian Governu hakarak mos konvida setor privadu, para setor privadu mos senti katak banku ne’e mos sira nian hotu,” nia katak.
Enkuantu Prezidente Komisaun C Parlamentar, Deputadu Manuel Tilman, hateten prosesu ba kriasaun BDNCTL ne’e prosesu la’o neneik liu no presiza hadia jestaun.
“Regra hanesan banku komersial tenki hadia e depois ninia osan rasik ne’ebe ita aloka iha ne’eba ita tenki hadia,” Deputado Tilman sujere.
Nia hateten tan katak se wainhira pagamentus pur tranferiensia ba konta emprezariu sira nian ba funsionariu sira bele poupa tempu.
“Para funsionariu sira lalika sai husi servisu hodi halo bicha bo’ot iha Banku BNU nia oin ka komersial nia oin poupa tiha osan ne’e e depois osan ne’e ba los ema, hanesan ne’e sasan nia folin mos tun, ema mos moris hakmatek,” katak tan Deputado Tilman.
