Atu garante Eleisaun Presidensial no Parlamentar la’o ho justu, livre, ho transparansia no imparsialidade, Sekretariadu Tekniku Administrasaun Eleitoral (STAE) komesa recruta observador eleitoral sira ne’ebe sei halo observasaun iha sentru votasaun sira iha teritoriu tomak.
“Ami oras ne’e loke ona tempo hodi simu kandidatu sira ne’ebe maka atu sai hanesan observadores eleitoral no fiskais kandidatura sira nune’e bele partisipa hodi observa no halo kobertura iha sentru votasaun no Apuramentu Distrital no Nasional,” dehan Xefe Departamentu Informasaun Publiku STAE, Saturnino Expostu Babo, semana kotuk (02/02), iha Caicoli, Dili.
Tuir Xefe Babo durante periodo ne’e iha ona karta pedidu ba STAE husi observadores internasional no nasional no hosi fiskais kandidatura no media sira atu bele hetan kredensial husi STAE.
Atu tama ba Eleisaun, STAE sei fo treinamentu ba parseiru sira hanesan Polisia, Media, Provedoria Direitus Humanu e Justisa (PDHJ), Komisaun Anti Korupsaun (KAK), no observadores sira.
Nia hatutan tan katak oras ne’e dadaun STAE halo ona kontratu ba brigadista nain 630 iha distritu 13 nia laran, motorista nain 34, ofisial lojistika 91, ofisial e ducasaun votantes hamutuk 13 , ofisial informatika (IT) hamutuk 130, ba durasaun fulan neen nian hahu iha dia 01 de Fevereiru to’o 31 Jullu iha distritu hotu hodi fo apoio ba iha prosesu Eleisaun Jeral tinan ne’e.
Diretor Cabral afirma katak STAE hamutuk ho Komisaun Nasional Eleisaun (CNE) no Polisia Nasional Timor-Leste (PNTL) mak sei tau matan ba prosesu eleitoral tomak iha rai laran liu liu karik iha manipulasaun ruma kona ba prosesu ne’e.
“Tanba STAE orgaun administrativu, Komisaun Nasional Elisoens (CNE) ho PNTL iha obrigasaun atu informa ba kandidatu bainhira manipulasaun ruma,” nia dehan.
