Tuir Prezidente Grupu Feto Parlamentar (GMPL), Parlamentu Nasional, Deputada Josefa Alvares Soares, katak violensia dala barak mosu iha uma laran tanba falta de komprensaun entre feen no la’en.
“La’en baku feen to’o mate nebe maka ita hare iha RTTL [Televizaun no Radio Timor-Leste] ne’e hau mos lahatene tanba saida, mas talves tanba ekonomia iha uma laran mak ladun favorese ba sira nain rua atu bele moris ho diak e dala ruma mos tanba inkomprendesaun iha uma laran tanba factus deskonfiansa ruma karik ne’e maka bele mosu buat hanesan ne’e,” dehan Prezidente GMPTL Soares, semana kotuk (01/02), iha PN, Dili.
Deputada ne’e hatutan fator seluk maka hanesan la bele domina emosaun ne’ebe ke iha, factores hanesan ne’e maka lori mane ida halo violensia to’o pontu ida ne’e ou to’o mate. Nia haktuir katak atu hamenus VD ne’e mos tenki komprensaun nomos ema presiza aprenda oinsa sira bele maneja hirus hodi nune’e bele moris iha dame nia laran.
Entertantu staf Diresaun Nasional Formasaun no Edukasaun, Sekretaria Estadu Promosaun Igualidade (SEPI), Carla Maria Valenti, hatete SEPI halo ona sosializasaun ba iha komunidade, lider komunitaria, to’o iha area rurais kona ba lei Violensia Domestika (VD).
Tuir nia, kona ba kazu nebe maka akontese la’en baku feen to’o mate ne’e presiza hatene uluk nia motivo.
“Ne’e hanesan kestaun ida la’en baku feen to’o mate ne’e katak problema ida ou krimi publiku ida nebe ema halo tiha ona, nebe ita la bele dehan feto mak salah, ou mane maka salah, maibe ita hare lai saida maka akuntese no masalah [problema] saida,” dehan Staff SEPI Valenti.
Nia hatutan, governu kria ona lei VD no fo ona konhesimentu ba komunidade maibe sei nafatin akontese violensia hasoru feto, ne’e tanba seidauk bele maneja hirus.
