Tuir Membru Parlamentu Nasional (PN), Deputado Aderito Hugo da Costa, katak kondisaun eskola iha teritoriu Timor-Leste tomak inklui iha Kapital Dili, husi ensino baziku to’o sekundariu ho kondisaun la seguru no aat teb-tebes.
“Hanesan escola ne’ebe halo rehabilitasaun maibe rehabilitasaun halo atu proteze ekipamentus material ne’ebe iha escola sira. Ita imajina escola secundaria ne’ebe ema rihun mak ba escola iha ne’eba maibe sira la tau atensaun,” preokupa Deputadu da Costa, semana kotuk (30/01), iha plenario NP, iha Dili.
Deputadu da Costa hatutan katak maske governu halo rehabilitasaun ba eskola sira hanesan halo sintina, halo ecola foun maibe laiha moru atu hadulas tanba escola ne’e iha duni komunidade sira nia uma le’et.
“Tanba ne’e ita hare katak problema menus meza-kadeira akontese tanba meza ho kadeira sira tau iha sala sira ne’e laiha odamatan, laiha janela, kuando komunidade sira presiza iha situasaun saida deit sira bele ba foti,” hatete Deputado ne’e.
Tanba ne’e nia parte husu ba Ministeriu Edukasaun atu tau atensaun hodi monta seguransa eskola (penjaga sekolah) nune’e tinan-tinan labele gasta osan hodi sosa buat sira ne’e.
Entretantu Vise Prezidente Komisaun F Parlamentar, Deputado Francisco Jeronimo, hateten rezultadu peskiza ne’ebe sira halo iha baze identifika katak husi ensino baziku to’o sekundariu sei infrenta problema menus meja-kadeira, livrus no fasilidades seluk tan.
“Escola sira ne’ebe iha Dili laran hanesan 05 de Maiu Becora labarik sira atu tur tan deit iha meza leten mak hakerek, tur nafatin iha rai, kadeira laiha nafatin, meza laiha nafatin. Ita la tau atensaun e sira fo atensaun fali ba projectu pilotu implementasaun lian materna la hare ba problema Educasaun nian konaba problema meza kadeira nian,” Deputado Jeronimo hatutan tan.
