Komisaun Nasional das Eleicoens (CNE) halao enkontru ho partidu politiku sira iha rai laran para oinsa bele asegura diak liutan konaba Eleisaun Prezidensial ninian atu nune’e eleisaun lao ho susesu.
“Ohin dadersan ida ne’e ho ambitu ida deit atu oinsa bele halo diskusaun konaba planu saida mak CNE iha tiha ona atu asegura eleisaun ida nebe diak ho susesu hanesan mos susesu nebe ita hetan ona iha tinan kotuk,” hateten Prezidenti CNE Dr. Faustino Cardozo iha Caicoli, Dili, semana kotuk (23/1).
Dr. Cardoso dehan tan katka liu husi diskusaun ne’ebe mak halao ho partidu politiku sira ne’e bele assenta hamutuk kestaun importante sira ne’ebe mak atu bele asegura ba susesu eleisaun ninian.
“Iha kestaun tolu nebe mak ohin sai focus diskusaun ita nian. Kestaun eleisaun pasifiku, debate publiku ba kandidatu Prezidenti da Republika ninian, nune’e mos eleisaun legislativu ninian.”
Iha diskusaun ne’e Prejidenti CNE Cardoso aprezenta programa pakote informativu ba partidu politiku sira. “Iha neba iha lei regulamentu kodigu de kondutas, materiais tomak konaba edukasaun civika ninian nebe relasiona ho eleisaun ninian.”
Dr. Cardoso mos esperansa katak pakote informativu ne’e bele sai hanesan bukae ba estrutura partidus politikus no ba figura saves ba eleisaun ba Prezidenti da Republika nian.
Entertantu Komisario CNE, Padre Martinho Germano da Silva, apela ba partidus politikus atu labele ataka malu.
Martino dehan iha eleisaun 2012 tempu sufisiente durante fulan ida atu prepara Paktu Eleisaun Pasifika molok CNE propoin loron 28 Fevereiro nudar loron bele halibur hamutuk ba paktu ida ne’e.
“Molok to’o iha 28 Febreiru Komisariu sira sei ba vizita dala ida tan ba kandidatu Prezidenti da Republika ba partidu politiku sira.”
Komisariu Martinho hateten iha 28 Febreiru CNE sei diskuti tan ho partidu politiku sira hodi fo hanoin, fo ideas no sujestaun ba malu.
Iha fatin hanesan, Prejidenti Partidu Klibur oan Timor Asuwain (KOTA), Manuel Tilman, hateten enkontru ho CNE ne’e kapas tebes.
“Kandidatu ba kandidatu, partidu ba partidu, hau la hatene tanba sa mak partidu balun nunka mosu, haruka deit ninia reprejentativu,” dehan KOTA Prezidente Tilman.
“Hau louva inisiativa CNE ninian ho STAE nian nebe mai fo informasaun barak I klaru.”
Alende ne’e Prezidenti Partidu Frente Mudansa, Jorge Teme, informa katak sorumutu ida ne’e iha valor tebes-tebes tanba molok tama iha eleisaun partidu barak hanesan ne’e tenki tur hamutuk atu fahe idea ba malu, fo hanoin ba malu, atu bele eleisaun 2012 lao ho susesu.
“Tanba eleisasun sei halao dala rua, eleisaun Prejidenti dalaruma dala rua, depois eleisaun parlamentar ita lakohi atu repete saida mak akontese iha ulu-uluk. Ita hakarak pas, estabilidade ba ita nia rai, no ba ita nia povu,” dehan Frente Mudansa Prezidente Teme.
Nia enjoraja tan kada partidu tenki eduka ninia militantes atu bele komprende lolos jogo demokratiku ka Eleoens ne’ebe sei tuir mai iha tinan ne’e nia laran.
