Tuir Kordenador ba Uma Mahon Casa Vida, Domingos Soares, katak Uma Mahon tolu ne’ebe mak bain-bain atende vitima sira durante ne’e sei aluga ne’e duni planu iha tina 2012 husi parte Casa Vida hakarak atu hari’I Uma Hakmatek rasik.
“Planu ida ne’e tanba uma mahon tolu nebe maka ami uza ne’e ami sei aluga ne’e duni iha tinan 2012 ne’e ami hakarak iha uma rasik. Entaun ami iha planu ona ba tinan 2012 ne’e atu halo uma mahon rasik atu bele atende vitima sira,” dehan Kordenador Soares, semana kotuk (23/1).
Nia haktuir tan katak, presiza duni iha uma rasik tanba husi Caza Vida mos iha aktividade lubun boot ida atu implementa iha tempu naruk ne’e duni persija fatin mesak, liu-liu iha aktividade atende vitima nebe maka moras mental.
Durante ne’e Casa Vida atende deit maka vitima feto deit espera katak wainhira fatin iha rasik ona Casa Vida mos hakarak atende mos ba mane liu-liu mane sira ne’ebe maka moras mental.
Entertantu Lucia Marsal, Kordinadora Uma Hakmatek PRADET (Psychosocial Recovery and Development in East Timor) koalia mos kona ba sira nia planu ba 2012.
“Planu ne’ebe maka husi PRADET atu halo iha tinan 2012 ne’e atu inagura fatin hakmatek iha Oe-cussi. Ne’e sei akontese iha fulan Marsu 2012 ne’e. Ami ne’ebe mak parteira no doutor sei tuir Treinamentu Izaminasaun Forensika ne’ebe sei implementa iha fulan Abril,” dehan Lucia Marsal nudar Coordinador Uma Hakmatek PRADET, seman kotuk (23/1).
Nia haktuir tan katak, PRADET mos sei halo inagurasaun mos ba uma Hakmatek PRADET iha Suai iha tinan ida ne’e maske seidauk bele determina lolos iha sa fulan.
“Atendementu husi PRADET ba vitima sei nafatin hanesan bain-bain,” dehan Kordenadora PRADET Marsal.
