Komisaun nasional eleitoral (CNE) ho Sentru Tekniku Apoio da Eleisoens halao seminariu konaba fahe informasaun ba sistema eleitoral iha Timor-Leste.
“Ita hotu hatene iha 2012 ita sei halao eleisaun orgaun soberania rua, eleisaun prezidensial nune’e mos eleisaun parlamentar,” hateten Prezidenti CNE, Dr. Faustino Cardozo, semana kotuk (14/12), iha Sentro Convensoens Dili.
Prezidente CNE Cardozo hateten tan katak eleisaun rua ne’e iha 2012 nia natureza la hanesan tanba ida atu hili Xefi do Estadu no ida atu hili Reprejentante sira Povu nian ba tur iha Parlamentu Nasional no mos sei desidi Exekutivu ka Governu.
“Sistema nebe mak vigora ba tipu eleisaun rua ne’e la hanesan, ita temi sistema ita tenki hatene regras de jogos.”
Iha seminario ne’e partisipa mos Prezidenti da Republika, Dr. Jose Ramos Horta, Partidu Politiku sira, membrus Polisa Nasional PNTL, membrus Prokuradoria Geral da Republika no seluk tan atu nune’e sira bele hatene no halo tuir regras nebe mak iha konaba eleisaun ninian.
“Objetivu principal atu partilha informasaun konaba sitema [eleitoral] ne’e atu nune’e la bele mosu duvidas wainhira partisipa iha prosesu ida ne’e,” haktuir tan Pezidente i CNE Cardozo.
Entertantu Prezidenti Partidu Unidade Nasional (PUN), Deputada Fernanda Borges, hateten ba povu katak maske horas ne’e dadauk partidu barak mak mosu maibe tenki fihir liu mak kualidade.
“Ema sira nebe atu ukun ita bo’ot sira iha kapsidade ka lae? Hili nara-naran deit ita sai klansu egoismu la fo rezultadu ba ita nia nasaun,” dehan Deputada Borges.
Deputada Borges hatutan tan katak Timor-Leste rai ida ne’ebe soberanu partidu nebe mak ukun tenki responde ba povu nia nesesidades.
“Ne’e duni hau ba povu hanoin didiak, ita la persiza 22 partidus. Ita persija partidu rua ka tolu nebe bele ukun ita ho kualidade.”
