Prosesu simu estudante Universidade Nasional Timor Lorosa’e, UNTL, foun ba ano lectivo 2012 laiha mudansa maibe estudantes sei lasifika ba kategoria rua; estudante sira ne’ebe finaliza sira nia kursu iha 2011 ne’e avalia tuir sira nia rezultadu ezame nasional no sira tama direitamente ba UNTL no sira ne’ebe la klasifikadu ne’ebe sei oportunidade atu tama.
“Ita la hare diskriminasaun tamba estudante finalista 2011 fo oportunidade hanesan atu tuir ezame nasional. Agora ezame nasional hanesan bareira ida ba estudante sira terseiru ano [sekundario] hotu–hotu iha Timor laran tomak. Sira lamanan tanba sira nia valor ezame nasional la diak ne’e laos asaun dikriminativo,” hateten Director Direksaun Nasional Ensino Superior, Quintino Manuel De Cristo, semana kotuk (14/12), iha nia knar fatin, Ministerio Educasaun (ME), Vila Verde, Dili.
Tuir Director Quintino katak kompetisaun ne’e ba vagas iha universidade nasional nesessario tanba limitasaun vagas ba 2,000 estudantes deit, no mos tanba UNTL universidade estatal uniku iha Timor-Leste.
Director ne’e esplika katak prosessu ne’e aplika tiha ona ba tinan akademiku 2011. Naran estudante ho nivel ezame nasional aas tuir rekerimentu atu tama iha UNTL sira nia naran fo sai husi Jornal Diario Nasional. Wainhira sira hatene sira nia naran iha ba foti formulario iha Ministerio Educasaun no prienxe depois sira ba UNTL atu foti tan formulario universidade nian ne’ebe sira bele hili fakuldade ne’ebe sira hakarak tama no Departamentu ne’ebe sira estuda ba.
Entertantu estudante Marciano Belo hateten katak politika ME maske diak tanba enkoraja estudantes atu buka hetan rezultadu diak no ida ne’e diak atu desenvolve Timor-Leste maibe nia mos senti ba estudante sira ne’ebe rezultadu la to’o criteria ne’ebe presiza.
“Hau sente la dun kontente tamba estudante balun ne’ebe mak nilai la to’o estandar ne’ebe iha mos dezanima,” hateten estudante Belo.
Estudante Belo haktuir mos katak kuando naran estudantes la sai iha lista la bele mos tau sala ba Ministerio Educasaun tamba depende ba rezultado ezame nasional mak desidi no bainhira rezultadus la to’o estandar tamba estudantes mak la kohi atu esforsu a’an atu estuda tan atu hetan rezultadu ne’ebe presiza hetan.
