“Se Governu hakarak ema ne’ebe seidauk halo bele prolona tan tempu ba sira atu nune’e iha tempu eleisaun sira mos bele partisipa,” hateten komunidade Tasi Ibun Mateus Kampus Pinto, semana kotuk (16/12), iha Dili.
Komunidade Pinto hateten tan katak lei konaba eleisaun ninian iha tiha ona maibe dala ruma ema barak seidauk bele halo sira nia kartaun tanba tempu la iha halo sira nia kartaun no mos sira falta informasaun kona ba prosesu ne’e.
“Pur ezemplu ema nebe mai husi distritu ida tenki nia ba halo iha fatin neba, entaun balun nebe halao aktividade barak [iha Dili] sira la bele halo sira nia kartaun,” hateten komunidade Pinto.
Entertantu Deputadu Mario Viegas Carascalao, PSD, hateten katak Governu loke oportunuidade atu votantes bele halo ka hadia sira nia kartaun eleitoral antes fulan tama eleisoens ne’e la sala.
Deputadu Carrasalao hateten tan katak tuir lolos Comissão Nacional das Eleções (CNE) no STAE mak bolu atensaun liu hosi publisidade husi media sira para ema hotu-hotu bele hatene.
“Mais ita agora liu deit mak Internet deit, Radio, Televizaun maibe laos ema hotu iha Radio no Televisaun ne’e mak halo komunikasaun ba povu defisil oituan. Se Governu bele konsidera karik bele fo oportunidade STAE ho CNE bele halo prolongamentu semana ida ka semana rua tan,” sujere Deputao Carrascalao.
Iha fatin seluk funsionariu tekniku husi STAE nebe mak la fo sai ninia naran ne’ebe prosessa halo kartaun eleitoral ba komunidade sira iha Subdistritu Nain Feto, Dili, hateten katak halo koartaun eleitoral ba komunidade sira iha subdistritu neba komesa iha loron ida fulan Julhu no remata iha loron sanulu resin lima fulan Dezembru bazeia ba kalenraiu nebe mak CNE ho STAE fo sai.
“Ami bazeia ba autorijasaun husi CNE fo sai mai ami. Ami halo implementa tuir deit,” hateten fontes konfirmadu ne’e.
Tuir nia mos katak sira halo kartaun ba komunidade sira durante ne’e hahu husi idade 17 ba leten nebe mak la iha kartaun, no mos ba sira ne’ebe kartaun eleitoral tuan ka lakon no hakarak troka foun.
“Ami hotu iha loron 15 fulan dezembro 2011 maibe atu halo kontinuasaun ne’e depende ba CNE ho STAE; halo tan programa mak ami foin bele implementa tan,” hateten funsionario STAE ne’e.
