Timor Leste presiza harii Departamentu Tradusaun ba lei ofisial nasaun nian ba iha Lian Tetun atu nune habiban jerasaun hotu hotu bele asesu informasaun legal no mos fasil ba sira atu hato’o sira nia opiniao.
Prezidente Komisaun A, Parlamentu Nasional, Deputada Fernanda Borges, hateten katak ida ne’e knar Governo tenki iha Departmentu Komunikasaun ida ne’ebe haklaken lei sira ne’e.
“Parlamentu mos tenki ajuda komprensaun maibe hau hanoin tenki iha Departamentu iha rai ida ne’ebe ba lei ninian,” hateten tan Deputada Borges.
Tuir Deputada Borges, Ministerio Justisa (MJ) tenki halo esforsu bo’ot ida atu halo tradusaun ba lei sira ne’e hotu ba lian Tetun tamba ho Lian Portugues deit ema la komprende tradusaun sira ne’e tamba ita nia lian seidauk forte iha Tetun bele iha esplikasaun iha okos atu nune’e povu komprende saida mak lei ne’e hakarak atu halo.
“Atu nune’e povu hatene nia direitu mak saida, nia dever mak saida, saida mak nia tenki halo, saida mak nia tenki hetan husi lei. Ida ne’e atu nune’e ema bele hetan nia direitu humanus,” hateten Deputada Borges tan.
Se lae ita bele halo lei bar-barak maibe hanesan Parlamentu halo maibe povu la hatene administrasaun servisu iha funsaun publika mos la hatene tamba lian Portugues ne’e sira la hatene ida, sira la komprende no la konsege implementa lei sira ne’e hotu.
Entertantu Deputadu Mario Vigas Carascalao hateten katak se iha pontu ida komunidade la barak mak hatene Portugues, no balun deit mak hatene lei sira se iha Portugues entaun la iha ekilibrio.
“Lolos ne’e lei sira ne’e tradus mos ba tetun tamba tetun mos sai hanesan lian ofisial. Ita nia lian ofisial ne’e rua lolos ne’e lei hotu hotu tradus ba lian rua ne’e tamba kleur ona lei hotu hotu iha Portugues mas agora tempo ona kria instituisaun ida atu halo tradusaun sira ba lian tetun,” hateten Deputadu as Carascalao.
TDW ne’e koko atu konfirma asuntu ne’e ba iha MJ maibe la konsegue hetan komentariu hosi reprezentante responsavel.
