Estudantes nain 206 husi suku sia hosi Distritu Liquiça hetan sertifikadu kompleta foin lalais (25/10) kursu literasia no finansas baziku ne’ebe halao ba fulan sia nian laran ne’ebe implementa liu hosi East Timor Development Agency ka Ajensia Dezenvolvimentu Timor-Leste (ETDA) hamutuk ho parseria hoa organizasaun Tuba Rai Metin hodi fo tulun ba familia agrikultor sira buka vida moris liu husi apredizajen kona ba areas rua ne’e.
Estudantes main 206 ne’e hosi suku sira: suku Ulmera, Fatumasi, Darulete, Dato, Leotala, VatuVo, Vatuboro, Guisu no Lisadila. Iha kursua fulan sira nia laran sira aprende atu aprende le, hakerek no kona ba kontabilidade bazika.
“Hau orgullu teb-tebes tanba iha programa ne’e hau haree feto maka barak no mos iha interese atu aprende lee no hakerek, hodi nu’unee bele hadiak sira nia vida-moris,” hateten Administrador Distritu Liquica, Domingos [apelido] durante seremonia entrega sertifikadus.
Iha formasaun ida ne’e partisipantes hetan oportunidade hodi aprende halo nu’usa harii negosiu tuir rekursus mak iha, no aprende kontabilidade, hodi hanesan ne’e sira bele hetan kreditu husi instituisoens mikro-finansas hanesan Tuba Rai Metin.
Programa ida ne’e tulun husi AECID (Ko-operasaun Espana) no FUNDESO (organizasaun internasional, Espana).
“ETDA simu knaar hodi fo formasaun ba literasia no jestaun finansas bazika, liu husi Ministeriu Edukasaun nia programa kona-ba alfabetizasaun. ETDA konsege fo tulun ba partisipante nain 206 aprende lee no hakerek importante ba ita nia vida moris,” hateten Diretora Ezekutiva ETDA, Palmira Pires.
“Ita boot sira hatene lee no hakerek, agora ita boot sira tama ba faze ne’ebe tenki tau iha pratika ba saida mak ita boot sira aprende. Bainhira ita hakarak fila liman ita prezisa hatene uituan mos kona-ba numeru, maibe fila liman la’os deit aprende hatene hakerek no sura. Fila liman, kerdizer, ita boot sira tama ba setor privadu. Iha setor privadu, iha buat tolu deit: ida ne’e maka serbisu, serbisu no serbisu,” hateten tan Diretora Pires.
