Tuir dadus hosi Ministerio Saúde (MS) iha Timor-Leste hosi Abril 2003 to’o Abril 2011 numero ema afektadu ho virus HIV/SIDA iha rai laran hatudu katak numero feto aas liu mane.
Numero pasientes konfirmadu ho moras HIV/SIDA iha rai laran hamutuk nain 228 ho pasientes ho idade tinan 25 to’o 44, kompostu husi feto hamutuk 116 no mane 112, fila fali ba persentajen feto 51 pursentu no mane 49 pursentu.
“Ita hanoin katak ita nia maluk feto sira sai hanesan iha grupo vuneravel” dehan Chefe Marta Abenia do Santos, (24/10), [Titulo no naran servisu fatin], Lahane, Dili.
Chefe fos Santos hatutan tan katak MS indentifika maioria pasientes ho HIV/SIDA iha Distritus tolu; Dili, Bobonaro no Baucau.
Iha lidun seluk Direktor Klinika Bairo Pite (KBP), Doutor Daniel Murphy, hateten katak laos feto deit mak hetan numeru aas husi moras HIV/SIDA maibe mane hotu.
“Ne’e hau nia esperensia mane balun hetan uluk moras HIV/SIDA tanba ne’e mane mate. Se feto seidauk mate tanba sira hemu aimoruk ho teratur hodi prolonga sira nia vida moris. Mane hemu aimoruk la tuir regra bele mate tanba ne’e feto hetan numeru aas liu mane,” hateten Dr. Murphy iha edifisio KBP, iha Bairo Pite semana kotuk (25/10).
Dr. Murphy hatutan katak feto Timor-Leste hetan risku moras HIV/SIDA husi mane Timoroan rasik no Timoroan mane hetan infeksauan ho virus HIV husi feto estranjeiru liu husi prostituisaun. Hanesan Timoroan mane ba iha liur hetan virus HIV/SIDA no hadaet ba feen bainhira halao relasaun seksual ho feen tanba virus HIV/SIDA fasil daet liu husi relasaun seksual wainhira la uza proteksaun hanesan kondom.
“Husu ba ema hot-hotu liu-liu ba joventude sira kuandu halo relasaun seksual tenke uza kondom no hau fiar 99 pursentu la hetan virus HIV/SIDA. Kuandu la uza kondom fasil atu hetan virus HIV/SIDA,” haktuir Dr. Murphy.
Doutor ne’e esplika mos katak moras HIV/SIDA la bele kura maske bele kontrola; katak ema bele moris kleur hanesan baibain maibe tenke hemu aimoruk retroviral lor-loron la bele falta, se falta problema bo’ot no moras oin-oin bele mosu tanba virus HIV halo ema nia sistema imune fraku no la bele luta hasoru infeksaun no moras oin oin.
