Vendedore iha Bidau-Lesedere Dili lamenta kona-ba toilet publiku ne’ebe foer tanba la iha bee durante tinan rua.
“Ami ne’ebe maka fa’an sasan durante tinan rua ona iha ne’e la uza haris fatin publiku tanba bee laiha’no haris fatin ne’e foer lo’os halo ami ne’ebe fa’an sasan iha ne’e la aguenta no wainhira ami atu han mos ladia’k tanba iis dois ne’e. Bele halo ami moras no sira ne’ebe serbisu kona-ba bee nian ne’e mai to’o iha ne’e maibe sira la halo buat ida,” hateten Vendedora Maria Ximenes, foin lalains iha Bidau-Lesidere, Dili.
Nia hatutan tan katak se wainhira bo’ot bo’ot sira la tau matan ba haris fatin ne’e no husik deit hanesan ne’e,entaun bele halo halo moe de’it, liu liu se ema internasional ruma hakarak mos uza hariis fatin publiku ho kondisaun nune.
Iha parte seluk, Bernadino de Zena lamenta kona-ba haris fatin puliku ne’ebe maka sai hanesan nesesidade ba ema hotu wainhira presiza atu uza.
“Hau hanesan vendedor ida iha area ne’e sente ladun di’ak tanba haris-fatin ne’ebe ita atu uza loron-loron falta bee atu fase ka hamos foer sira. Dalaruma ami atu ba sintina, ami tenke ba kuru bee iha maluk sira atu nune’e mai fase foer iha sintina ne’e. Ita hatene katak haris-fatin ne’e tenke iha bee maibe haris-fatin ne’e laiha, se hanesan ne’e lalika harii haris-fatin iha ne’e se la tau bee,” dehan Bernadino.
Nia hatutan tan katak, haris-fatin publiku balun ema sobu tiha, no sira ne’ebe hela besik iha ne’eba maka tau matan hela ba haris fatin ne’e atu nune’e ema la bele ba sobu arbiru no ba sintina hodi halo iis, no ida ne’e bele afeta ba sira-nia saude, tanba haris-fatin ne’e ema hotu uza.”
Tuir Xefe Distribuisaun Agua de Dili, Francisco dos Santos, katak haris-fatin publiku ne’ebe maka to’o agora la asesu tanba ema ne’ebe kaer projetu ba haris-fatin la ba fo hatene iha Diresaun Nasional Servisu Agua e Saneamentu (DNSAS).
“Ami husi DNSAS sempre hala’o ami nia servisu nafatin, maibe ami labele halo buat ida se wainhira sira ne’ebe kaer projetu la mai fo hatene ba ami entaun ami seidauk bele ba estabelese bee iha ne’eba,” katak Xefe dos Santos iha nia knar fatin, iha Kaikoli Dili.
Nia haktuir tan katak, sira sei ba estabelese bee ba haris-fatin publiku wainhira ema ne’ebe kaer projetu iha ligasaun ho sira ka ba fo hatene ba sira, tanba funsaun sira nian mak atu estabelese bee ba komunidade tomak maibe liu husi prosesu, nia haktuir.
