Estudante Universidade Nacional Timor Lorosa’ e (UNTL) prepara-an ba Pós-gradusaun ne’ebe sei realiza iha Novembru oin mai iha salaun Centro de Convenções Dili.
Tuir Vise Departementu Inglez Agustinho da Conceição haktuir katak, estudante ne’e mak atu tuir graduasaun, primeiru tenke iha kualidade atu nune’e bele fó kontribuisaun no dezenvolvimentu nasaun nian.
“Estudante ne’ebe maka atu tuir graduasaun tenke iha kualidade signifika katak sai husi UNTL ba buka servisu iha fatin oi-oin, Governu no NGO, atu bele aplika saida mak sira aprende durante hala’o estudu iha Universidade”, tenke vise ne’e iha nia knaar fatin UNTL, Liceu.
Nia hatutan katak, wainhira sira atu tuir graduasaun sira tenke halo investigasaun ruma no iha preparasaun ho di’ak hodi hatan ba perguntas, dehan nia.
Entretantu estudante Domingos de Andrade sei esforsu aan atu hetan notas diak.
“Wainhira realiza pós-graduasaun ne’e, buat hotu ho prosesu husi universidade no estudante sira tenke tuir ezame mezmuké hetan nota la hanesan, tan ne’e hau mos hakrak esforsu atu nune’e bela atinji objetivu no hetan nota ne’ebe di’ak,” hateten estudante UNTL Domingos de Andrade.
Estudante ne’e hosi Departamentu Dezenvolvimentu Komunitario, hatutan tan katak nia espera wainhira nia remata ninia graduasaun ne’e nia sei halo buat di’ak ruma ba nasaun no oinsa atu liberta povu husi ki’ak nia laran.
Iha parte seluk, Herminia Morreira da Silva hanesan mos estudante hateten katak prosesu atu gradua ne’e la’os tempu naruk maibe atu tama iha prosesu estudu graduasaun.
“Wainhira ita atu gradua, ne’e tenke tama iha prosesu estudu graduasaun, entaun ita tenke liu hotu materia ne’ebe iha departementu ida-idak no tenke liu ezame de teze,” dehan nia.
Nia haktuir tan katak, nia sei aplika ninia koñesimentu no matenek ne’ebe nia hetan iha nia estudu no implenta iha baze atu foti rai Timor-Leste.
