Komunidade Becora em jeral la asesu ba bee moos tinan sanulu ona tanba kanu ligasaun ba iha sira nia diresaun hetan estragus husi ema deskonesidu.
“Ami iha aldeia ne’e desde 2001 to’o agora laiha bee moos tanba kanu ligasaun bee nian ema deskonesidu estraga tiha e to’o agora boot sira seidauk hadia fali,” preokupa komunidade Becora bairo Ailele-Hun Anita Coreia semana kotuk iha Becora Dili.
Tanba ne’e nia parte husu ba governu liu husi SEkretariu Estadu Eletrisidade Agua e Urbanizasaun (SEAU) atu hare problema ne’e.
“Se bainhira bo’ot sira la mai haree ne’e, ami sente triste tanba durante ne’e ami ba kuru deit bee iha jardin Kolmera nian tanba iha ne’eba bee sai estraga deit,” nia dehan.
Iha parte seluk estudante Hermenegilda ne’ebe hela iha Becora, sente triste tanba bainhira atu ba eskola sei ba kuru bee hodi enxe ba tanki no bidon.
“Hau hanesan estudante ida, sente triste tebes tanba laiha bee moos, ita hotu hatene katak bee ne’e importante tebes ba atividade lor-loron nian, talves hau atu ba eskola hau tenke ba kuru tiha lai bee hodi enxe ba tanki no bidon mak foin bele haris ba eskola,”nia lamenta.
Tanba ne’e nia husu ba governu atu monta fali kanu ne’ebe mak hetan estragus,e husu mos ba ema hotu atu kuidadu no labele estraga tan kanu, nune’e ema hotu bele asesu fali bee moos hanesan uluk.
Entretantu hatan ba preokupasaun ne’e, Xefe Departementu Abastesimentu Agua Distritu Dili Celso Amado hateten komunidade sira laiha manutensaun ba fasilidade ne’ebe monta tiha ona no servisu hamutuk ho parte SAS nian.
“Ami nia servisu mak ami tun ba baze hodi hare problema sira ne’ebe komunidaee sira infrenta maibe laiha suporta husi komunidade no fasilidade ne’ebe tau iha ne’eba lakon hanesan torneira, komunidade laiha konsiensia estraga bee moos, iha ligasaun kanu illegal no lahanoin ema balun ne’ebe la hetan bee moos,” Amado dehan.
Nia hatutan, sira iha ona planu atu dada bee moos iha bairu ne’ebe seidauk asesu ba bee moos maibe sira presiza seguransa hodi hala’o sira nia servisu.
“SAS iha ona planu atu monta kanu ba iha bairu sira hanesan Comoro,Aituri-laran,Becora, Kakaulidun, Bebonuk no seluk tan no bainihra ami ba monta iha bairo ida-idak,ami lori PNTL atu nune’e ami bele hala’o ami nia servisu ho seguru,”nia katak.
