“Kestaun importante mak ro 3 ne’e atu para iha ne’ebe,tanba portu temporariu Hera sei iha konstrusaun nia laran, “ preokupa peskizador husi Fundasaun Mahein (FM) Joao Almeida semana kotuk (21/09) iha Balide,Dili.
Kona-ba deklarasaun husi Sekretariu Estadu Defeza(SED) Julio Tomas Pinto ne’ebe hateten katak konstrusaun ba portu ne’e sei remata iha fin de Novembru “ita espera katak Novembru bele remata ona nune’e ro 3 ne’ebe para iha ne’eba no bele halo manutensaun,”nia esperansa.
Entertantu Koordenador Peskiza Frey Guteres hateten, ro tolu ne’ebe mak Governu Korea fo ajuda ba Komponente Naval ne’e ro ujadus ne’ebe presiza halo manutensaun ho kustu ne’ebe bo’ot.
“Ro ujadu ne’e nia manutensaun la hanesan ho ro foun tanba ro foun ne’e ita gasta osan oituan deit maibe kuandu ro tuan nia gasta barak liu tanba ne’e presiza iha portu ida,”nia katak.
Frey hatutan, total orsamentu ne’ebe governu aloka ba iha konstrusaun portu Hera hamutuk US$ 7 milioens husi orsamentu jeral 2010 nian maibe to’o agora konstrusaun ne’e rasik seidauk remata.
