Maske tuir ona formasaun professional bar-barak maibe numeru dezempregu kontinua aumenta husi tinan ba tinan tanba ne’e governu tenke iha politika ne’ebe adekuadu no balansu hodi akomoda dezempregadu sira.
“Treinamentu ne’e tenke tuir ida-idak nia mata pencaharian, ezemplu hanesan ema ne’ebe ku’u kafe tenke treina oinsa mak ku’u kafe, karpintaria tenke tuir treinamentu karpintaria nian no seluk tan maibe ida ne’e politika husi SEFOPE nian e sira mak tenke orienta didiak,” hateten Prezidente Komisaun H Parlamentar Antonio Cardoso, semana kotuk (19/09) iha PN.
Tuir nia, Sekretariu Estadu Formasaun Profesional e Empregu (SEFOPE) presiza kopera hamutuk ho Ministeriu Agrikultura bainhira iha formasaun kona-ba agrikultura nian.
Entretantu tuir dadus ne’ebe iha SEFOPE iha Departementu Merkadu Traballu hatudu katak numeru dezempregu husi 2005-2010 ho total 8.719 no numeru joventude ne’ebe tuir ona formasaun husi 2005-2010 ho total 5.561.
Iha parte seluk Domingos Rangel, formandu ne’ebe tuir ona formasaun professional iha 2008 iha Sentru Formasaun Tibar kona-ba karpintaria nian, sente kontente ho formasaun ne’e tanba aumenta sira nia kapasidade.
“Hau sente kontente tanba liu husi formasaun ne’e hau hatene buat barak maske seidauk hetan servisu maibe hau kontente,” hateten Rangel
