“Hau sente kontente no orgullu tebes ho rezultadu kompetisaun ida ne’e tanba hau mak juara I e ida ne’e mak hau nia objetivu durante ne’e,”hateten Julio Diaz ho kontente hafoin simu premiu ho osan $400,00 semana kotuk (15/09) iha salaun Prezidente Nicolau Lobato,Lanud Dili.
Tuir nia, kontente laos tanba hetan premiu maibe esperiensia ne’ebe nia hetan sai hanesan osan mean ida atu oinsa bele prepara aan diak liu tan iha futuru.
“Ho ida ne’e hau bele prepara aan diak liu tan iha futuru atu sai lideransa ne’ebe diak iha futuru, oinsa koalia iha publiku,”nia dehan.
Nia hatutan, lideransa ne’ebe diak presiza iha etika koalia ne’ebe diak mos e liafuan ne’ebe fo sai tenke sukat didiak “tanba liafuan bele oho ema, bele sobu ema, sobu mundu tanba ne’e hau tenke prepara aan husi agora,”nia katak.
Iha Parte seluk Diretor Jeral Ministeriu Educasaun Apolinario Magno hateten kompetisaun diskursu partisipa husi reprezenta eskola 7 husi eskola sekundariu husi rejiaun I to’o V, mak rejiaun I Aileu, II Baucau, III Bobonaro,IV Dili no rejiaun V Oe-Cusse.
“Hau orgullu tebes e hau mai iha em nome de ministru educasaun ne’ebe labela mai hola parte iha ne’e e hau hare diskursu sira ne’ebe sira na’in 7 halo ne’e diak hotu laiha ida mak la diak ,”nia katak.
Tuir Diretor ne’e, ida ne’e hanesan fas parte educasaun sivika nian liu-liu relasaun ho papel eleisaun nian hodi garantia demokrasia iha Timor-Leste.
Enkuantu tuir Xefe Komisaun Organizadora ne’ebe lakohi publika nia identidade katak husi estudante nain 7 ne’e, ne’ebe mak valor bo’ot liu mak sai primeiru lugar. “Juara I hetan osan $400,00 ho sertifikadu, juara II $300,00 ho sertifikadu no juara III $200,00 ho sertifikadu e sira ne’ebe lahetan juara hetan sertifikadu deit,”hateten fonts ne’e.
Total orsamentu ba kompetisaun ne’e rasik hamutuk $ 640,00 , husi total osan ne’e uza ba refresment $360 (Rejiaun Dili iha $80,Ainaro $80,Baucau $80,Bobonaro $80,Oe-Cusse $40) transporte ba estudante ho mestre ne’ebe akompana total $110, (Ainaro $20+10,Baucau $20,Bobonaro $20,Dili $30 no Oe-Cusse $20),akomadasaun ka hela fatin total $145,00 (Ainaro $30 +15, Baucau $40, Bobonaro $20,Dili $35, no Oe-Cusse $20) e total orsamentu husi kada distritu ba atividade ne’e husi Distritu Ainaro hamutuk $130 (155), Baucau $140,Bobonaro $120,Dili $145 no Distritu Oe-Cusse $80) total iha $615 + 25 (640).
“Entaun total lolos orsamentu ba eventu ne’e hamutuk $615,00 + $25,00 ne’e estudante sira husi Maubesi ba transporte + akomodasaun,”esplika fontes konfirmadu ne’e.
