Relasiona ho Prezidente Partidu ASDT, Deputadu Francisco Xavier do Amaral ne’ebe la ativu ona iha Parlamentu maibe kontinua uza kareta estadu, tuir Xefe Bankada ASDT Domingos da Costa katak tenke entrega ba deputadu ne’ebe substitui.
“Hau hanoin, deputadu ne’ebe la ativu hala’onia knar iha Parlamentu, nia laiha direitu atu uza kareta estadu maibe tenke entrega ba deputadu ne’ebe substitui, tanba avo Xavier iha ona kareta estadu ne’ebe estadu fo ba nia atu uza,”hateten Xefe Bankada ASDT,Domingos da Costa semana kotuk (15/09) iha Uma Fukun,Dili.
Tanba ne’e tui nia, kareta Parlamentu nian ne’ebe mak Prezidente ASDT uza tenke entrega fila- fali ba Deputadu substitui atu nune’e bele hala’o atividade Parlamentu nian.
“Tenki entrega tanba tuir lei ema ida tenki iha kareta ida labele rua, se deputadu ida laiha kareta, bele atraza nia servisu no dalaruma atu tuir reuniaun ida nia labele ba tanba transporte laiha,”nia katak.
Entretantu Prezidenti Parlamentu Nasional,Fernando Lasama de Araujo husu ba Sekretariadu Parlamentu nian atu dada hikas kareta Parlamentu nian ne’ebe oras ne’e Francisco Xavier do Amaral sei uza hodi fob a Depatada substitui.
“Deputada substitui Clarina la hetan kareta no tenke entrega ba nia, karik orsida halo surat ruma ho respeitu ba ita nia aman katuas ne’e ,bele hela ho kareta estitular ninian ona e ida be kareta parlamentu nian ne’e bele pasa mai senhora Deputada Clarinha para hodi halo servisu,” Lasama informa.
Alende ne’e tuir Deputada Tereza Amaral husi bankada ASDT katak antes prezidente partidu sai husi parlamentu, kareta nee entrega kedas ba iha Deputada substitui.
“Maibe komu foin dadauk ita nia proklamador ne’e moras, mak kareta ne’e para iha ospital loron rua ka tolu, maibe kareta ne’e lor-loron tula senhora Clarina husi uma ba servisu fatin,”nia dehan.
