Relasiona ho kondisaun terminal Becora ne’ebe klo’ot, bis diresaun Lospalos nian para deit iha Lesidere hodi buka no hatun pasajeirus sira.
Tuir kondutor bis Lospalos, Claudio da Silva katak, durante ne’e sira la para iha Terminal Becora tanba terminal klo’ot liu e wainhira Bis Baucau no Viqueque okupa tiha fatin sira la iha fatin atu para.
“Ami durante ne’e para deit iha tasi ibun sira ne’e tanba Becora fatin klo’ot liu,” hateten kondutor bis Mau-ma ne’e semana kotuk (14/09) iha Lesidere,Dili.
Nia dehan, durante ne’e sira para de’it iha Lesidere hodi buka pasajeiru e bainhira bis nakonu, sira sai no la liu husi terminal.
“Ami tula penunpang husi Lospalos mai tenki para iha Lesidere tanba ami la iha fatin atu para iha terminal Becora tanba fatin klot Bis Baucau no Viqueque deit mak nakonu, nia katak.
Tanba ne’e tuir nia, governu presiza halo estensaun ba terminal Becora, nune’e bis Lospalos mos bele para no buka pasajeiru iha terminal ne’e.
Entertantu tuir Deputadu Renan Selak katak, Bis Lospalos la para iha terminal tanba hare liu ba kondisoens ekonomia povu nian.
“Agora ita nia povu selu transportes husi Lospalos mai selu 8 dolares,entaun bis nain sira no mos sofer sira hadau malu penumpang ida-idak hakarak lori to’o iha sira nia uma,” Selak dehan.
Renan hatutan,sofer sira lori pasajeiru sira to’o iha sira nia uma tanba sira kumpriende povu nia moris.”Nune’e pasajeiru sira labele gasta tan osan atuselu taxi ba to’o uma, maibe kestaun mak oras ida kondutor ho kondutor mak problema malu, tanba lolos bis para iha terminal,” nia katak.
Tanba ne’e, Deputadu husi Lospalos ne’e husu ba kondutor bis Lospalos sira atu para deit iha terminal nune’e hamenus problema entre kondutor taxi no mikrolet iha sidade laran.
Nia dehan ,bis sira ne’ebe para la tuir regra, polisia tranzitu iha obrigasaun atu kaer hodi selu multa.
