“Hau nudar professor ida sente triste tanba orsamentu ba Ministeriu Edukasaun bo’ot teb-tebes maibe na realidade estudante balun kontinua tur deit iha rai hodi hala’o prosesu aprendijazen nomos kondisaun eskola ladiak atu fasilita estudante sira atu estuda ho diak,” preokupa Francisco da Costa, semana kotuk iha Dili.
Tuir nia, eskola hirak ne’ebe kondisaun eskola aat no seidauk rehabilita hanesan Eskola Sekundaria 12 Novembru, 5 de Maiu no 10 Dezembru kondisaun eskola aat hotu ona maibe seidauk hadia nomos balun laiha meja-kadeira, livrus maibe ministeriu laiha atensaun ba buat sira ne’e.
Francisco hatutan, kualidade ensino la’os atu professor sira mak tenke domina lingua maibe kuandu fasilidade la sufsiente fo impaktu mos ba sira nia estudu.
Iha parte seluk tuir estudante eskola Sekundaria 4 Setembru UNAMET, Balide, Belarmino de Jesus, katak kondisaun eskola mos hanesan fator determinante ba kualidade estudante sira nian e nia parte kontente tanba sira nia eskola oras ne’e halo hela rehabilitasaun.
“Hau sente la kontente tanba iha ami nia sala laran sei menus meja no kadeira e ida ne’e difikulta ami nia aulas maibe hau kontente tanba ami nia eskola agora halo hela rehabilitasaun,”nia dehan.
Entretantu Diretor Jeral do Ensino Sekundaria, Alfredo de Araujo hateten oras ne’e dadaun eskola balun komesa halo ona rehabilitasaun , hanesan eskola Sekundaria 4 Setembru no Finantil inklui mos eskola balun iha distritu.
“Rehabilitasaun ba eskola hirak ne’e hanesan pakote ida inklui kompleta ho mobiliarias meja-kadeira no husu ba estudante no mestre sira atu kuidadu eskola sira ne’e hodi halo prosesu aprendijazen,”nia dehan.
Alende ne’e nia parte mos husu ba komunidade sira atu labele estraga fasilidade eskola no infraestrutura eskola nian nune’e alunus sir abele utilize hodi halo prosesu aprendijazen.
