“Laiha servisu entaun halo joventude sira tur iha dalan ibun, hemu tua hodi provoka malu e ikus mai hamosu konflitu entre joventude sira, ne’e hanesan fator ida husi fator sira seluk,”hateten Deputadu Domingos Mesquita, semana kotuk iha PN.
Maske ohin loron iha projetu bar-barak maibe ne’e laos permanente, katak projetu ne’e remata entaun sira laiha ona servisu.
“Kuandu sira iha ona servisu permanente, sira sei la tur iha dalan ninin, tanba okupadu ho nia servisu no laiha tempu no razaun atu provoka malu tan,”nia dehan.
Tanba ne’e, governu iha obrigasaun atu loke kampu servisu ba joventude sira ne’e nune’e labele kria tan konflitu iha railaran.
“Kria atividade oi-oin, fo kapasitasaun ba sira ,haruka ba eskola nune’e sira bele sibuk”nia katak.
Alende ne’e Deputadu Antonio Cardoso husi komisaun H ne’ebe trata asuntu Juventude e Desportu hateten, kuandu ema la iha servisu tur hanoin barak ninia impaktu mak hamosu konflitu.
“Dezempregu sira bolu malu tur hamutuk hemu tua depois ba asalta ema nia sasan,” Cardoso dehan.
Tanba ne’e labele hakfodak bainhira mosu konflitu bar-barak tanba ema kuandu laiha servisu nia hanoin ba deit buka problema.
Deputadu husi bankada Fretilin ne’e husu mos ba governu atu loke kampu servisu, fo oportunidade hodi kapasita joven sira nune’e bele aumenta sira nia kapasidade.
“Se la’e bele kria instabilidade iha rai laran, provoka ameasas, ameasa seguransa no seluk tan,”nia dehan.
