Sentru eletrisidade ne’ebé uza bee iha Maukale iha sub-distritu Baucau vila,distritu Baucau hetan estragus tanba impaktu husi dezastre naturais rai monu e Governu iha obrigasaun atu hadia hikas fatin ne’e.
“Ne’e obrigasaun Governu nian hakarak ka lakohi tenke hadia,” hateten Deputadu Domingos da Costa, semana kotuk iha Parlamentu.
Sentru eletrisidade ne’e rasik harii servisu hamutuk Governu ho embaixada Norwegia iha Timor-leste iha tinan kotuk e liu husi sentru ne’e komunidade barak iha distritu ne’e hetan benefisiu tanba fo naroman ba sira iha tempu kalan.
Tuir Deputadu ne’e, la’os de’it iha Maukale, maibé eletrisiadade ne’ebé tama ona iha povu nia le’et iha fatin hotu-hotu, bainhira iha failansu ruma Governu tenke lalais hadia.
Entertantu tuir fonts konfirmadu, komunidade Maukale ne’ebé uluk servisu ba projetu ne’e via telephone hateten eletrisidade komesa lakan kedas iha 2010, maibé agora aat fali tanba rai halai “halo tohar hotu kanu bee nian,”.
Nia hatutan, oras ne’e dadaun rehabilitasaun ba fatin ne’e la’o nafatin tanba seidauk remata. “Agora ha’u la servisu ona iha ne’eba maibé ha’u hare ema hadia fila fali ona e seidauk remata ,”nia informa.
Enkuantu wainhira jornalista koko konfirma asuntu ne’e ba iha Sekretariu Estadu Eletrisidade Agúa e Urbanizasaun maibé la konsege tanba laiha fatin.
