Hanesan tinan-tinan, tinan ne’e Grupu Estudante Hadomi Natureza (ESHANA) seihalo atividade lao ain husi Alas-Same mai Dili hodi komemora loron Falintil 20 Agustu, maibé seidauk iha preparasaun atu halao atividade ruma hodi selebra loron ne’e.
“Ami seidauk tur hamutuk maibé ami iha ona planu sa atividade mak ami sei hala’o ba komemorasaun loron importante ida ne’e,” hateten membru Grupu ESHANA, Noemio Freitas semana kotuk iha Kampus Universidade Nasionál Timor Lorosa’e (UNTL),Liceu Dili.
Tuir planu, sira sei halo atividade la’o ain husi Same mai Dili hanesan iha tinan kotuk grupu ne’e la’o ain husi Viqueque mai Dili hodi selebra loron Falintil.
Iha fatin hanesan Jose Nelven,membru grupu ESHANA husi Fakuldade Ekonomia, Departementu Jestaun, hateten iha tempu badak sira sei kria enkontru ida hodi koalia kona-ba planu no atividade la’o ain ne’e.
“Aban ga bainrua ami halo enkontru ona konaba preparasaun aktividade ruma hodi halo ba 20 Agustu nian”nia informa.
Iha parte seluk Crizogno Martins, estudante UNTL mós, katak Grupu ESANA ne’e sira halo ona aktividade la’o ain husi SAME mai to’o iha Dili ba loron restaurasaun independensia 20 Maiu foin dadauk ne’e.
“Fulan ida ne’e ha’u seidauk hatene sira nia programa hodi prepara ba 20 Agustu nian ”dehan Crizogno Martins.
Grupu ESHANA hanesan grupu uniku iha Timor-leste ne’ebé nia membru mesak estudante UNTL hala’o atividade la’o ain husi fatin ida ba fatin seluk, liu-liu bainhira komemora loron bo’ot nasionál ruma.
Iha mós atividade ne’ebé sira halo durante iha dalan, mak vizita ba fatin historiku, identifika aihan tradisional ne’ebé uluk gerilyawan sira han durante iha ai laran no mós hala’o jogu amizade ho komunidade sira iha fatin ne’ebé sira tama ba.
Durante sira hala’o sira nia atividade, fatin barak mak sira tama ona mak hanesan Baucau, Viqueque, Maliana, Atauro, Waimori, Same,Aileu no seluk tan.
