Relasiona ho fos marka MTCI subsidiu husi Governu ne’ebé lakon kleur ona iha merkadoria halo komunidade sira iha capital Dili diskontente tanba fos sira seluk ne’ebé agora fa’an iha merkadu ho folin karuun hotu.
“Ami povu ki’ik sente treste tanba fos MTCI la fa’an ona iha dalan ninin,nebe ami sempre sosa,” preokupa Thomas Saldanha, nudar konsumidores,semana kotuk iha Dili.
Tanba ne’e nia parte husu ba Governu atu kontinua distribui fos MTCI ne’e, nune’e povu kiik sira bele sosa.
Tuir nia, fos ne’ebé agora domina merkado mak hanesan fos Globus, Kuda Ulun, Matahari inklui fo ho marka UNAPE, maibé fos hirak ne’e negosiante sira fa’an ho karuun liu no halo povu kiik sira dada iis.
Entretantu tuir loza na’in Star King Audian ne’ebe lakohi publika nia identidade, katak nia parte la fa’an fos MTCI maibé sira fa’an fos globus.
“Fos Globus kada saka ho kilograma 35 ami fa’an ho $18,00,” tuir fonts ne’e.
Fonts ne’e haktuir, kada tinan sira importa fos Globus ho toneladas 3.000 e kona-ba fos ne’ebé mak ema sosa barak “depende ba konsumidores sira nia gostu, sira hakarak hola ida ne’ebé,”nia dehan.
Entretantu bainhira jornalista tenta atu konfirma asuntu ne’e ba iha Ministériu Turismu Komersiu e Industria (MTCI) maibé lakonsege tanba director ne’ebé toma konta ba asuntu fos laiha fatin.
