Relasiona ho vendedores barak mak kontinua fa’an iha trotoar leten iha merkadu Comoro nian, tuir komunidade katak sira fa’an iha trotoar tanba kondisaun merkadu aat.
“Ne’e la’os sira nia hakarak hodi fa’an iha dalan ibun maibe tanba kondisaun merkadu ladiak entaun hakarak ka lakohi sira tenke fa’an iha dalan ninin,” informa Feliz da Costa,semana kotuk iha merkadu Comoro,Dili.
Tuir nia, se governu hakarak sira fa’an iha merkadu laran, governu tenke hadia merkadu ne’e.
“Kondisaun merkadu ladiak e governu mos nunka hanoin atu hadia, oinsa mak sir abele fa’an iha merkadu laran,”nia dehan.
Iha fatin hanesan tuir vendedor ida ne’ebe lakohi fo sai nia identidade, katak nia parte kontinua fa’an iha trotoar leten to’o governu hadia merkadu ne’e.
“Ami moris ho fila liman, se governu hakarak ami fa’an iha laran, entaun tenke hadia uluk merkadu ne’e,” hateten vendedor ne’e.
Entretantu tuir observasaun jornalista iha fatin ne’eba nota katak bainhira tempu loraik, estrada ibun husi parte Eskola 10 Dezembru nia oin to’o iha Belak Fuel nian oin nakonu ho vendedor sira ho sira nia modo tahan, no hamosu engrafamentu iha fatin ne’eba.
Enkuantu bainihra jornlaista koko konfirma asuntu ne’e ba iha Administrador Distritu Dili, Ruben Braz de Carvalho, maibe lakonsege tanba nia laiha fatin.
