“ Halo planu ne’e atu orienta estadu, oinsa mak sira halo dezenvolvimentu tuir nia prioridade ne’ebe diak to’o alkansa nia objetivu final, hodi bele hadia povu nia moris tomak ne’ebe sei mukit hela atu sai diak liu tan iha tempu oin mai,” hatete Deputadu Pedro da costa Martires, semana kotuk iha Parlamentu Nasional.
Planu Estratejiku ba Dezenvolvemntu Nasional (PEDN) ne’e rasik aprova iha Parlamentu Nasional iha 11 Jullu 2011, e planu ne’e sai hanesan mata dalan ba tinan 20 oin mai.
Tuir nia, PEDN rasik ho nia objetivu atu kria benefisiu estabilidade ba komunidade sira tanba iha povu maka halo planu no sei implementa iha povu nia le’et.
“Iha planu ne’e atu kria infastrutura ba povu sira hanesan, kria estrada ba sira ne’ebe dalan la diak, dada bee ba sira ne’ebe seidauk hetan bee mos, dada eletrisidade ba sira ne’ebe seidauk asesu eletrisidade, kria eskola, kria ospital ba sira ne’ebe dook husi ospital hodi atende sira nia saude,”nia hateten.
Entretantu tuir Xefe Gabinete Ministeriu Finansas (MF), Jose Abilio katak planu estratejiku ne’e hanesan indikador ida ne’ebe tau tiha ona iha vizaun tinan 2020 nian.
“Tanba iha 2020 ita hakarak ita nia kondisaun sai mudansa, ema hotu-hotu bele asesu ba estrada, hodi nune’e labarik sira bele ba eskola, liu-liu fo eskola gratuita ba povu kiak nia oan sira, suku ida tenki iha ospital ida,tanba kondisaun indikadores sira identifika tiha ona,”nia katak.
Tuir nia, planu ne’e sei fo benefisiu ba komunidade sira iha areia rural liu-liu iha foho leten. “loke estrada fo sira,dada ahi, bee moos, loke ospital atu hamenus mortalidade infantil no buat seluk tan,”nia hateten.
Alende ne’e tuir komunidade Kaikoli, Germano Perreira, katak planu estratejiku dezenvolvimentu nasional mak hanesan mata dalan ida hodi Governu sira uja ba sira nia servisu tuir estrutura ida.
“kuandu planu ne’e maka mata dalan ba governu sira hodi uja atu hadia ami povu kiak sira nia moris tenki hare uluk ami povu nia preokupasaun lor-loron, laos halo planu deit to’o ikus ita nunka haree nia rezultadu,”nia dehan.
