Membru Rede Feto (RF) nain2 ba partisipa eventu internasional Kongresu Mundial Feto iha Canada durante semana ida hodi aprende buat barak liu-liu kona-ba asuntu feto nian iha ne’eba.
“Sim, ami hetan konvite husi Nova Yorke e sira mak dirizi eventu ne’e, iha ne’e ami sei koalia kona-ba oinsa feto foti desizaun iha nivel nasional, iha Parlamentu, iha governu inklui setor hotu, koalia kona-ba programa abrodajen de jeneru e mos kona-ba violensia domestika,” informa Prezidente Rede Feto, Ivete de Oliveira, semana kotuk iha Salaun Canossa Becora, Dili.
Tuir nia, Rede Feto hanesan sosiedade sivil ne’ebe servisu durante tinan barak nia laran, liu-liu asuntu ne’ebe afeita ba feto nia vida husi okupasaun Indonezia to’o ohin loron hodi defende nafatin direitu feto nian.
“Nasaun Unidas sira konese Rede Feto nia papel durante tinan 10 depois ita manan funu hodi hetan indepedensia tanba ne’e sira bolu ita ba atu fahe no fo hanoin husi nasaun seluk no nasaun seluk mos bele aprende mos husi ita,” nia dehan.
Ivete sente eventu ida ne’e interesante tebes tanba alende fahe esperiensia, sira moa bele aprende buar barak hodi aumenta sira nia konesementu.
“Ami Kontente tebe- tebes Ita aprende aprosu foun kona-ba organiza eventu bo’ot ida uza maneira foun ida nebe deferente para halo diskusaun ne’e la’o kapas , ema halo peskiza barak ne’ebe sira hato’o iha kongreso nia laran kona-ba mudansa, mudansa sa mak akontese ida ne’e sai hanesan baze signifikante ida katak ba oin ita atu halo programa ruma kona-ba peskiza ne’e involve ema akademika ,” nia katak.
Iha parte seluk Jasinta Luzina, Diretora Ezekutiva Rede Feto, konsidera kongresu ne’e importante atu partisipa nune’e bele aumenta esperiensia no konesementu kona-ba asuntu oi-oin neebe aprezenta husi nasaun seluk iha eventu ne’e.
“Hau hanoin importante tebes Rede Feto partisipa iha eventu ne’e tanba ho ita nia presenza iha kongresu ida ne’e hatudu katak ita bele aprende programa ruma ne’ebe ita nia maluk feto sira husi nasaun seluk bele fahe mai ta, e iha oportunidade ida ne’e ita mos bele hato’o ita nia kondisaun saida deit mak akontese iha ita nia rai laran,” nia katak.
