Relasiona ho sasan illegal barak mak tama iha Timor-leste (TL), diskunfia Servisu Polisia Imigrasaun (SPI) halo pratika suborn, maibe parte imigrasaun rezeita total informasaun ne’e.
“Hau senti informasaun ne’e la los,” hateten Adjuntu Komandante Servisu Polisia Imigrasaun, Inspektur Xefe Luis Barreto iha nia knar fatin Vila-verde Dili, semana kotuk.
Tuir nia, iha fronteira iha unidade barak mak servisu e servisu imigrasaun halo pasa revista ba dokumentus viajen nian de’it.
“Maibe karik iha ema ruma rona informasaun katak membru imigrasaun balun halo pratika subornu,bele mai hato’o iha superior imigrasaun, nune’e ami bele halo investigasaun,”nia husu.
Kona-ba membrus SPI balun ne’ebe halo rotasaun tanba diskunfia halo pratika suborn, Luis hatan “Ne’e la los, rotasaun ne’e normal iha instituisaun ida, dalaruma balun fulan tolu, fulan 6 halo rotasaun, nune’e sira labele kolen,”nia hatan.
Entretantu tuir komunidade Agostu Magno, katak SPI hanesan servisu estadu nian, labele simu subornu. “Tanba sira rasik halo hanesan ne’e, otomatis ita nia rai laran nakonu ho ema illegal no sasan illegal e taxa ba estadu laiha,”nia dehan.
Entretantu bainihra jornalita tenta atu konfirma asuntu ne’e ba iha Xefe Alfandega, maibe la konsege tanba okupadu.
