Prezidente Repúblika José Ramos Horta hakarak promove grupu moradór sira iha Timor-Leste tanba ne’e tradisaun Timoroan nian no labele lakon iha tempu modernu.
Nia dehan, tradisaun moradór ne’e ikus-ikus ne’e maioria iha munisípiu sira lakon ona, iha munisípiu balun de’it mak sei utiliza moradór iha serimónia nasionál, no igreja nian balun.
“Ha’u hakarak hamoris no promove fila fali tradisaun moradór iha Timor-Leste no bele kontinua promove husi jerasaun foun sira tanba moradór ne’e kultura ita-nian no labele lakon,” Prezidente Horta dehan iha Palásiu Prezidensia Ai-Tarak Laran, Dili.
Prezidente dehan, durante viajen tama sai munisípiu no suku iha territóriu laran iha munisípiu ne’ebé mak sei kontinua promove moradór mak hanesan munisípiu Manatuto liu-liu iha Soibada, iha Liquisa Maubara, Ermera, Aileu no Díli.
“Bainhira ha’u vizita suku sira, ha’u triste tebes tanba tradisaun moradór komesa lakon, maibé ha’u ba fali suku seluk ha’u haree moradór sira, orgullu tebes ho sira nia korneta no tanbór antigu nian tanba ne’e, ha’u la kohi tradisaun moradór ne’e lakon iha tempu modernu nian,” nia dehan.
Tanba ne’e nia dehan, moradór sira reprezenta istória no tradisaun ne’ebé mak sei moris hela, sei sai guarda ba instituisaun estadu nian no sei apoiu seguransa ba serimónia bo’ot sira ne’ebé mak estadu ka igreja realiza.
“Ha’u mós iha ona planu atu apoiu ekipamentu hanesan korneta no tambór ba moradór sira ne’ebé mak sei hala’o sira-nia atividade, tanba ne’e husu atu kontinua promove,” PR Horta salienta.
Iha fatin hanesan, Fundadór Moradór nune’e mós Lia-Na’in Munisípiu Díli, Pio Ataide, dehan nu’udar uma-lisan bo’ot prontu nafatin no firme hodi kontinua promove moradór ba jerasaun foun sira, tanba ne’e kustume ne’ebé be’iala sira husik hela no labele lakon leet de’it.
“Ha’u hahú hala’o moradór iha 2007 hamutuk ho maluk na’in 85 mak durante ne’e hala’o knaar moradór iha Díli, nune’e mos iha Palasiu Prezidente. Ami kontente tebes ho kustume moradór hodi servisu ba estadu ida-ne’e,” nia dehan.
Nia mós husu ba autóridade munisípiu sira tenke promove moradór iha ida-idak nia munisípiu, postu-administrativu no suku, nune’e bele aprezenta iha loron nasional estadu no igreja nian.
