Polísia Nasional Timor-Leste (PNTL) prende ona suspeitu kazu homesidiu ne’ebé mak akontese iha ponte BJ Habibie, Dili, iha loron 6 janeiru, no oras ne’e iha ona sela detensaun Polísia Munisípiu Díli hodi kontinua prosesu ba ministériu públiku.
Portavós PNTL, Superientendente Xefe Arnaldo de Araujo, dehan suspeito ne’ebé polísia prende kaptura iha munisípiu Manufahi, iha Postu admistrativo Fatuberlihu, Suku Fatukahi, Aldeia Fatikesi, suspeitu nia munisípiu orijen.
“Depois de kaptura ekipa intelijénsia transporta kedas mai Díli no oras ne’e dadaun ita asegura ona iha sela detensaun Komandu Polísia Munisípiu Díli,” nia dehan.
Nia hatete, suspeitu refere no inisiál OC, mane, ho tinan 22.
“Autór ne’e iha ona polísia nia liman, hodi halo identifikasaun nune’e bele enkamina ba ministériu públiku tanba sira mak na’in ba prosesu,” Superientendente Xefe Araujo dehan iha knaar fatin iha Kaikoli.
Enkuantu nia dehan, kona-ba motivu akotesimentu ne’e, seidauk hatene loloos tanba sei iha hela prosesu nia laran hodi hatene katak tanba saida mak suspeitu sona vítima ho inisial DG to kanek grave.
“Oras ne’e dadaun vítima halo hela tratamentu iha Hospital Nacional Guido Validares (HNGV) hodi rekupera nia saúde,” nia informa.
Iha parte seluk família vítima Lizia Maria da Conceição Correia hatete, polísia tenke halo prosesu justisa ne’ebé mak justu ba autór ne’ebé mak sona nia oan no tenke submete ba tribunal nune’e nia bele iha responsabilidade ba hahalok krime ne’ebé mak nia komete.
“Ami la kohi husik nia livre iha liur, nia tenke iha prizaun,” inan Correia dehan.
Alende ne’e nia dehan, nia oan ne’e inosente tanba la inklina iha grupu arte marsiais saida de’it maibé tanba sa mak tenka sona nia oan to’o kanek grave, tanba ne’e tenke aplika medida ne’ebé forte ba autór ne’ebé mak halo krime ba nia oan.
