Estudante Universitario hamutuk 8,000 la tuir elisaun prezidensial (ElPar) ba tinan 2022-2027 tanba rejisto tarde iha Sekretariado Tekniku Admistrasaun Eleitoral (STAE) hodi vota iha sentro votasaun paralelu iha Dili laran.
Brigada ba ElPar iha sentru Votasaun Paralelu, Elias de Deus, hateten antes ne’e STAE fo sai ona katak sidadaun ne’ebe mak rejisto hodi vota iha sentro votasaun paralelu rejisto antes dia 2 de marsu maibe liu husi ne’e la autoriza vota iha sentro paralelu no tenke fila ba ida-idak nia suku.
“Ita nia estudante 8,000 ne’e sira mai lori ho dokumento kompleto maibe sira labele vota tanba naran iha lista ne’ebe mak rejisto iha STAE la iha,” Brigada sentro votasaun paralelu Deus hateten iha GMT.
Enkuanto nia dehan, total estudante ne’ebe mak rejisto hodi tuir vota iha sentro votasaun paralelu tolu iha Dili ne’e hamutuk 800 ital deit.
“Ba estudante universitario 8,000 ne’e tenke fila ba ida-idak nia munisipio mak bele vota, se la fila entaun sira labele vota ba eleisaun prezidensial tinan 2022-2027,” nia salienta.
Alende ne’e nia rekonhese problema ida ne’e tanba, eleisaun ida sentru votasaun paralelu ne’e konsidera faze pílotu deit, nune’e tenke hasoru problema sira ne’e hodi nune’e ba oin atu hadia diak liu tan.
Entretanto, estudante Universidade Nasional Timor-Lorosa’e (UNTL) Julmiro Fernandes, hateten dokumento hotu nia hatama maibe tanba saida mak nia naran iha lista Sekretariado Tekniku Admistrasaun Eleitoral (STAE) hodi vota iha sentro votasaun paralelu la iha.
“Hau la hatene razaun saida mak ami labele vota, ne’e ami lakon direito. Tuir lolos loron ohin ne’e ami ezerse ami nia direito hodi deside nasaun nia futuru,” estudante UNTL Fernandes hateten.
Tanba ne’e sira sei konfirma ba STAE tanba saida mak sira prense tiha formulariu no prense deklarasaun husi eskola no fakuldade mak intrega ba maibe tanba saida mak labele vota.
Iha fatin hanesan, estudante Universidade Dili (UNDIL), Serjinho Caet, hateten nia la vota tanba rejista tarde.
“Hau rekonhese katak ami rejisto tarde tanba ami la iha informasaun konaba rejisto hodi vota iha sentro votasaun paralelu sira taka ona iha dia 2 ne’e, no kolega balun la rejisto sira lori deit deklarasaun husi eskola, tanba ne’e mak ami labele vota,” nia dehan.
