Diretora Jeral Prestasaun Saúde iha Ministerio da Saúde, Dotora Odete da Silva Viegas hateten governu ho apoia tekniku husi parseiru dezenvolvimentu sira hahu tiha ona halo peskiza foun ba ai-han no nutrisaun iha teritorio tomak.
Nia dehan peskiza ne’e importante tebes atu hare fali rezultado implementasaun programa nutrisaun ne’ebe durante ne’e lao iha rai laran tanba esforsu barak maka halo ona hodi kombate malnutrisaun.
“Ita hotu hatene programa nutrisaun ne’e fo vantajen ba komunidade ka lae, entau meus ida maka ita tenke halo peskiza ba lalaok programa nian durante ne’e tanba peskiza ikus kona ba ai-han no nutrisaun halao iha tinan 2013. Agora tinan 2020, tempu ona atu halo peskiza foun,” nia hateten hafoin halo entrega instrument peskiza ba enumerador sira, iha salaun Palacio da Sinzas, Dili.
Nia dehan bazeia ba qesionario ne’ebe dezenvolve ona iha sasukat balun ne’ebe presiza hare maka hanesan sukat labarik sira tinan lima mai kraik no asesu ba iha programa nutrisaun.
Nia hatutan enumerado sira mai husi profesionais saúde no pesoal saude publika sira ne’ebe ne’e hetan ona formasaun no peskiza ne’e rasik sei halao durante fulan tolu.
Nia informa dadus peskiza demografia no saude tinan 2016, hatudu taxa malnutrisaun tipu raes badak tun husi 85% ba 50%, maibe prevalensia ida ne’e sei kategoria a’as iha Rejiaun Sudeste Asia nian.
Iha parte seluk, Vice Reprezentante UNICEF iha Timor-Leste, Scott Whoolery hateten peskiza ne’e importante tebes atu identifika problema nutrisaun iha rai laran tanba malnutrisaun sai problema ne’ebe prioridade.
“Ita bele identifika problema nutrisaun iha Timor, nune’e ajuda foti desizaun no asaun sira ne’ebe relevante ho situasaun,” nia hateten.
Nia mos agradese ba iha ema hotu, liu-liu profesionais saude sira ne’ebe involve ona iha prosesu elaborasaun quetionario ba peskiza ida ne’e.
Peskiza ida ne’e implementa husi Ministerio da Saude no UNICEF no hetan apoia tekniku husi World Food Program (WFP), Agensia Koperasaun Internasional Korea (KOICA), no Uniaun Europea. Orsamentu estimasaun ba peskiza refere hamutuk $500,000.
