Tinan anu lektivu 2020 estudante foun ba ensinu recorrente iha Suco Caicoli, Postu admistrativu Vera Cruz, Municipio Dili, total estudante foun hamutuk 60 resin maibe fahe ba gropu 2, eskola dader ho loraik.
Tuir Presidente Ensinu Recorrente, Hipolito Marques Sarmentu hateten ensinu recorrente Suco Caicoli hari iha tinan 2015 ate agora produz ona estudante 40 resin.
“Ami hakarak hari ensinu recorrente tanba ita hare jovens sira hola sedu feto no hola sedu mane, ne’ebé sira nia eskola iha ensinu basicu la remata no balu iha ensinu pre-sekundaria mos la remata, entau ami hare kazu ne’e akontese bo’ot iha suco laran, entau ami planu harii ensinu recorrente ne’e,” dehan nia.
Nia mos hatutan tan objetivu Suco Caicoli hari eskola ne’e tanba foin sa’e sira ne’ebé hola ona feto ho mane ne’e, sira nia idade ba bebeik ona, entau sira moe la kontinua ona sira nia eskola, tanba ne’e mak planu ida ne’e mosu.
“Ami nia apredijazem ne’e la taka dala ba suco seluk e nomós postu sira seluk. Professor sira mai husi ministeriu edukasaun tanba ministeriu mak halo rekrutamentu professor nain tolu depois haruka mai hanorin iha ne’e, ne’ebé agora dadauk ami prossesu apredijazem ne’e lao normal nafatin,” nia subliña.
Nia mos informa tan katak ensinu recorrente hahu hari ate agora produz ona estudante ba dala tolu, total estudante hamutuk 40 resin mak hetan ona nia direitu hodi kontinua iha nivel sekundaria.
“Hau mos agradese ba edukasaun tanba rona ami nia lian, ne’ebe ami bele loke ensinu recorrente iha ne’e nomós Banco Mundial tanba ajuda ami $20,000 hodi hari eskola ne’e,” tenik nia.
Entretanto, Diretor Ezecutivu TLCE, Jose Monteiro haktuir katak ensinu recorrente ne’e loke husi ministeiru edukasaun maibe iha diresaun ida iha ministeriu nia okos.
“Konaba ensinu recorrente ne’e hau hanoin diak tanba jovens sira ne’ebé la remata eskola bele kontinua fali maibe tuir ami nia observador iha baze katak professor sira ne’ebé ne’e nia pozisaun laos professor tanba ne’e balu paradu e governu menus kontrola,” nia hatutan.
Nia mos dehan maske nune’e, ensinu recorrente nia lalaok iha Timor laran ne’e balu lao diak no balu paradu, entaun maioria husi municipio mak lalao tanba vontade husi jovens sira tuir mak laiha tanba laiha sosializasaun ho sensibilizasaun.
“Hau hanoin ensinu recorente ne’e importante tebes ba ita nia jovens sira tanba ita adopta planu dezenvolvimentu sustentabel ne’ebé ita nia prinsipiu mak la bele husik ema ida iha kotuk, tanba ita konstitusaun RDTL mos garantia edukasaun ba ema hotu, tanba ne’e mak hau dehan ensinu recorrente importante”, tenik nia.
