Xefe Departamentu Sirurjia Hospital Nasional Guido Valadares (HNGV), dotor Alito Soares hateten 50% husi 3 mil resin pasiente ne’ebe halo operasaun sofre moras apendicitis (usus buntu).
Alende ne’e, iha mos moras seluk hanesan ruin tohar, no fatuk no seluk tan.
Nia dehan, iha tinan 2018, servisu operasaun hatudu progressu diak tebes tanba rezultado auditoria mortalidade husi 0,8% iha tinan 2015 tun ba 0,5% tinan 2018.
“Moras Apendicitis ne’e mosu tanba multifactor, maibe iha Timor –Leste barak liu akontese lumbringa mak intupidu, intupidu foer husi hahan sira ne’ebe konsumu entaun imflamasaun maka’as tenke halo operasaun,” nia hateten hafoin partisipa iha seminario sentifiku ho tema “Hadia kualidade atendimentu ba pasiente iha HNGV” Bidau, Dili.
Nia dehan, pasiente balun mai ho kondisaun grave tanba intupidu ne’e nakfera ona entaun presiza atendimentu ne’ebe intensive liu tan.
Nia informa, agora dadaun HNGV infrenta limitasaun espasu ba operasaun, tanba sala tolu deit entaun pasiente sira ne’ebe la ho emeregnsia obrigado tenke hein to’o tinan, tanba pasiente emergensia kada loron barak ne’ebe tenke fo prioridade.
Entretantu, Diretor Ezekutivu HNGV dotor Aniceto Barreto rekonese espasu HNGV la sufsiente ona tanba volume moras aumenta lor-loron.
Nia dehan, HNGV agora dadaun iha kama hamutuk 280 no loke tan extra bed, maibe la sufsiente nafatin, liu –liu iha tempu sira ne’ebe mosu surtu dengue.
“Dezenho ida halo andar lima ba pedeatria, maternidade no internamentu nian hahu diskute ona iha governu sira anterior, no governasaun agora fo ona lampu matak ba ita dehan tinan 2020 bele halo ona konstrusaun,” nia hateten.
Nia espera, Ministerio da Saude bele aproxima xefe governu hodi asegura kondisaun infra-estruturas ne’ebe dignu ba iha ospital nasional.
